Qalasersuup affaa Rusland-ip oqartussaaffigaa
Qalasersuup sakkuutoqarfittut atorneqalersinnaanera ilimarunnaarpoq, taamatut inerniliipput qalasersuaq pillugu danskit nalunaarusiortut. Nalunaarusiortut tassaapput Dansk Institut for Militære Studier, nalunaarusiami sammineqarluni Kalaallit Nunaanni taassumalu eqqaani sakkutooqarnikkut siunissami suliassat.
Qalasersuup naqqani uuliamik gas-imilluunniit nassaartoqassagaluarpat, nunat sorliit uuliamik gas-imillu qalluillutillu aningaasatigut iluanaaruteqarsinnaanersut agguarneqareerput, tamannalu pivoq Naalagaaffiit Peqatigiit Immat atorneqarnerat pillugu isumaqatigiissutaat malillugu kiisalu aningaasarsiornikkut killigititat pioreersut malillugit.
Qalasersuup affaata missaannik annertutigisoq Rusland-ip nunavittaanut ataneqarluni oqartussaaffigineqarpoq, sinneralu nunat assigiinngitsut sisamat avillugu oqartussaaffigalugu.
Nunat assigiinngitsut qalersersuarmik oqartussaanerannik qularnaarilerneq ajunngikkaluartoq illersornissaq pillugu allannguutit piareersarneqaleruttorput.
Qalasersuup sikua aappat, umiarsuit takornarianik angallassisartut amerlasuut angalalernissaat takorloorneqarpoq, tamatumalu kingunerissavaa, imaatigut annaassiniarnermik suliaqarneq umiarsuarnik nakkutilliineq nunamillu oqartussaaffiit annertuumik allannguuteqarnissaat.
Imaatigut annaassiniartarnerup eqaatsumik ingerlanneqarnisaa anguneqassapput umiarsuit angalanerisa nalunaarsorneqartarnerat qaammataasallu atorlugit alapernaarsuineq pitsaanerusunik piumasaqaatitaqassaaq. Danskit nalunaarusiaanni siunnersuutigineqarpoq Kangilinnguani sinerissamik nakkutilliisoqarfik matuneqassasoq, Nuummillu sakkutuut qullersaqarfiannik nutaamik pilersitsisoqassasoq, tassani illersornissamut politiillu suleqatigiillutik annaassiniarnernik ingerlataqassammata.
