Qalasersuarmut ilisimasassarsiortut

Taakkua ilungersunartumik Qalasersuarmut ilisimasassarsiorniarput. Angalanerminni sikup issussusaata uuttortarnissaa siunertaraat aamma aakkiartornermini sukkassusaata uuttortarnissaa neriuutigaat.

Ilisimasassarsiortut tassaapput angutit marluk arnarlu ataaseq. Taakkua ingerlavissaat 1.000 kilometerinik isorartussuseqarpoq, maniilarsuit sikulu aqqutigiuminaatsoq, 50 gradit angullugit issitsigilersinnaasumi angallavigissavaat, siunnerfiallu tassaavoq Qalasersuaq.

Ilisimasassarsiortut sisoraasisarput kalitaraallu karsi sungaartoq, taanna radariuvoq, sikulu aqqutigisaat qanoq issutiginersoq taassuma uuttortartarpaa. Taannalu ilisimasassarsiortartut allat tusagaqarfigissallugu soqutigisorujussuuaat.

Ilisimasassarsiortut pisortaata Pen Hadowip oqaatigaa Radari aqqutigisani tamaat, 10 centimeterit ingerlareerlunilu, sikup issussusaanik uuttuisartoq. Tamatuma saniatigut ilisimasassarsiortut ullormut quleriarlutik sikumi qillerisarniarput.

Ukiualuit matuma siornagut ilisimatusartut oqaatigaat Issittup sikua ukiut 100-t qaangiuppata aakkumaartoq. Ullumikkut amerlaqisut isumaqarput, tamanna ukiut ikinnerusut qaangiuppata piumaartoq.

Suna eqqortuunersoq uuttortaanikkut immaqa paasineqarsinnaassaaq.

Ilisimasassarsiortut pingasuusut taquassaminnik timmisartukkut pajunneqartassapput. Peqataasulli ulorianartukkut ilisimasassarsiornertik qularutiginngilaat.

Nannunik naapitsisinnaavugut, imarnersanik sikunillu tissukartunik naammattuuisinnaalluta, tamakkuli tamaasa misilittagaqarfigaavut, Ann Daniels ilisimasassarsiortut arnartaat oqarpoq.