Qalasersuarmik pilerngunneq oqaluuserissavaat

Naalagaaffiit tallimat nunanut allanut ministeriisa, issittumi pissutsit pillugit Ilulissani aqagu naapinnissaanni Naalakkersuisunut siulittaasoq, Hans Enoksen aamma nunanut allanut ministeri, Per Stig Møller qaaqqusissuupput.
maajip 27-at 2008 07:35

Naapinnissami peqataasut issittumi Qalasersuarmilu pissutsinik soqutigisaqartuupput, Qalasersuarmillu pilerngunneq aallavigalugu torersumik isumaqatigiissuteqarsinnaaneq anguniarneqassaaq.

Nalagaaffiit peqataatitaqartussat tassaapput, Danmark/ Kalaallit Nunaat, USA, Canada, Norge Ruslandilu.

Qalasersuarmi uuliaqarferujussuaqarnissaa ilimagineqarmat ataatsimeersuarnermi torersumik politikkikkut isumaqatigiissuteqarsinnaaneq nunanut allanut nittarsaanneqarusuppoq.

Naalagaaffiit tamat akornanni imavissuarni inatsisit pillugit isumalioqatigiissitami qanoq aalajangiisoqartinnagu, nunat akornanni allanik isumaqatigiissusiortoqarnissaa Danmarkimit pinngitsoorniarneqarpoq.

Russit nunanut allanut ministeriata, Sergej Lavrov-ip Ilulissiarlu Danmarkimut aqqusaarnini iluatsillugu Dronning Margrethe-mut ullumi ilassinnikkiartorpoq.