Qalasersuarmik piginnittuuniunneq kipitinneqarpoq
Qalasersuarmi immap naqqata nunavimmut atanerata killinganut apeqqutinut tunngatillugu nunat akornanni suleqatigiinnerup suliallu ingerlanerani suleqatigiinnerup annertusiartornissaa taamaalilluni isumaqatigiissutigineqartoq, Canadami nunanut allanut ministerip, Lawrence Cannonip, ippassaq ataatsimeersuartoqarnerani inerniliuppaa.
Nunat tallimaasut Kalaallit Nunaata/Danmarkip, Norgip, Ruslandip, Canadap aamma USA-p nunat issittumiittut immakkut angallannermi sillimaniarnissaq pillugu suleqatigiiffiliornissaq aamma kissaatigaat, Issittumi Siunnersuisoqatigiinni ministerit ataatsimiinneranni, Nunatsinni 2011-mi pisussami isumaqatigiissuteqarnissaq anguniarneqarluni.
Issittup imartaanni umiarsuit angallattut amerleriartuinnarnissaannut tunngatillugu, nunat tallimat taakku isumaqatigiissutigaat, umiarsuit sannaannut isumannaatsuunissaannullu piumasaqaatinik sakkortunerusunik piumasaqaateqartoqartariaqartoq.
Nunani issittuni uuliamik gassimillu qalluinissamut soqutiginninneq annertusiartorpoq. Ineriartorneq imminut nammassinnaasumik aaqqissuunneqarpat, tamanna nunap inoqqaavinut kinguaavinullu aningaasaqarnikkut, inuttullu atukkatigut, ineriartortitseqataasinnaasoq, inerniliilluni isumaqatigiissummi oqaatigineqarpoq. Nunat tallimaaasut aamma Issittumi Siunnersuisoqatigiit avatangiisinik pitsaanerpaamik illersuinissamik aalajangersagaat tapersersorneqassasoq aalajangiuppaat.
