Qalasersuarmi ukiuni qulingajanni aatsaat taama sikuutigaaq

Beringip Ikarasassuani qaammatini kingullerni nilleqisumik anorlertuarneratigut Issittup imaa kvadratkilometerinik tuusintilinnik arlalinnik annertussusilimmik sikuvoq. Marsip naanerani siku 15 millionit kvadratkilometerinik annertussuseqarpoq.
Allattoq Elisa Isaksen
apriilip 20-at 2010 06:45

Taama pisarnerata "Issittup allanngorarnera"-nik taaneqartartutut ilisimaneqartup ilaatigut Europap avannaa USA-llu kangisinnerusortaa ukiuunerani issitsippai. Issittup allanngorarnera malunniuttarpoq anorit sakkortuut nigalinngorlutik Qalasersuaq, nalunaaquttap kaavinnera akimorlugu silaannarmik nillertumik kaavileraangassuk.

Mark Serrezep Coloradomi apummut sikumullu qitiusumik nalunaarsuiffimmi pisortaasup, Sikuiuitsup avannarliup sikuata 2007-mi minnerpaaffimmineeriarluni maanna annertussusia tupigusuutigaa. Tassami taamanikkut siku aasaanerani aatsaat taamak millisimatigitillugu uuttorneqarmat.

- Ukiuunera eqqumiitsorujussuuvoq. Sikuiuitsup avannarliup sikua annertunerulerpoq aamma Europap avannaani USA-llu kangisinnerusortaani issittorujussuulluni, tamakkulu tamarmik Issittup allanngorarnerujussuanut attuumassuteqarput, Mark Serreze oqarpoq. Taassumalu 2007-imi sikup milleriarujussuarneranut qisuariaatit ingasaassaanerarlugit oqaatigai. Misilittakkat ersersippaat, pisoq ataaseq tunngavigalugu inerniliinissarput mianersuutigissagipput.

- Ilumoorpoq gassit silaannarmik kissakkiartortitsisut silap pissusaa kiannerulersimmassuk, kisianni silap pissusaani allanngornerit, immap sarfaata allanngorneri, imaluunniit sikuiuitsup sikuata allanngorneri, piffissami sivikitsumi pisut, tamatumunnga uppernarsaatitut atussallugit kukkuneruvoq, Vicky Pope Tuluit Nunaanni silasiorfimmeersoq tapersiilluni oqarpoq.