Qalasersuarmi qituperaqarpoq

Qituperaq taanna ukiut marluk matuma siornagut immap naqqani 4,2 kilometerisut itissusilimmiittoq russit aqqartartuaraannit assilineqarpoq.

Atuagassiami Polar Biology-mi qituperaq taanna Nordpolip imartaani uumassusilinni uumasuni naasunilu Qalasersuarmi najugaqavissutut taaneqarsinnaasuni kisiartaavoq, taama Berlingske Tidende allaaserinnippoq.

Qitupeqqat eqimattanngorlutik immap naqqani uumasuupput, aqqartartunillu "MIR-1"-mit "MIR-2"-millu assilineqarmata raajaqartoq aamma takuneqarsinnaasimavoq.

Aqqartartut Qalasersuarmi russit ukiut marluk matuma siornagut erfalasuliineranni assiliisuupput.

Russit issittup imartaani soqutiginnittuunerminnik taamani nittarsaassiniarlutik immap naqqani erfalasuliipput.

Ruslandimi ilisimatuut qituperaq tassaanerarpaat latinerisut Bathyphellia margaritacea. Oqaatigaat qituperaq siumorneqartoq kisiartaalluni issittup imartaani uumasinnaallunilu amerliartorsinnaasoq.

Issittup imartaa, pingaartumik Qalasersuup imaata naqqa tikinneqanngisaannangajattuuvoq, taamaattumik Kalaallit Nunaata avannaata imartaa uumassisilinnik allanik ukiut arlallit qaangiuppata aatsaat nassaarfiusinnaasoq ilimagaat.

Issittup imartaani ilisimasassarsiorneq akisullunilu ulorianartuuvoq, ilisimaneqarpormi imartaq 4.262 meterinik itissuseqartoq.