Qalasersuaq russinit pileritsaanneqaraluttuinnarpoq
Issittup imartaata annersaanik piginnittuunertik Russit ukiorpaalunngortuni naqissuserniarsaraat. Kalaallilli Nunaat, Danmarki, USA, Canada Norgelu tamaannga killeqarfillit aamma annertunerpaamik piginnittutut inissinnissartik neriuutigiuarpaat. Russit piumasaat 2001-imi saqqummiunneqarmat immap naqqata misissorluaqqaarnissaa utaqqimaaqqaarusunneqarmat Naalagaaffinnit Peqatigiinnit itigartitsissutigineqarpoq. Taamaammat ukiuni makkunani naalagaaffiit Issittumik piginnittuusariaqarnertik uppernarsaasersorlutik naqissuserniarsaraat.
Russit Issittoq pillugu politikkiannut akisussaasuusoq, Arthur Gillian Giarov, nalunaarpoq Russit Issutumi misissuinerat annertusiartuinnartoq. Giarov, tassaavoq ukiut sisamat matuma siorna, kilometeritut sisamatut ititigisumi immap naqqanut Russit erfalasuannik nappaasoq.
Russit Issittumi misissuisarfii hunnorujut missaaniittut matoorarlugit maanna aqqaneq marluinnanngoraluartut, Giarov nalunaarpoq, maanna inuttalersorlugit ammaatiterneqaqqilersut. Issittup imartaani Russit atomitortunik arfinilinnik sikunik aserorteruteqarput, taamaammat naalagaaffiit suulluunniit atortutigut nallersinnaanngilaat.
Naalagaaffiit issitumut killeqarfillit annertunerpaamik imartamik piniarsaripput, nunarsuatsinnimi uuliap gassillu suli qallorneqanngitsup sisamaraarterutaat tamaani immap naqqani nassaassaasorineqarmat.
Issittumi pisuussutit pillugit siunissami sakkuaatoqannginnissaa anguniarlugu isumaqatigiinniartoqarnissaa Russit siunersuutigaat, namminnerli piumasatik nikisinneqassanngitsut nalunaarutigereerpaat.
