Qalasersuaq kikkunnit pigineqarnersoq oqallisigineqartariaqarpoq
- Qalasersuaq kikkunnit pigineqarnersoq oqallisigineqartariaqarpoq, taamaaliornikkut kikkunnit paarineqartariaqarnersoq paasineqarsinnaaniassammat, Michael Ignatieff, Calgarymi atuartunut oqalugiarnermini oqarpoq.
Canadap issittortaata sakkutuulersorfigineqarnerunissaa ministeriunerup Stephen Harperip sulissutiginiarpaa, Michael Ignatieffillu tamanna tapersersorpaa.
Sakkutuut Canadap issittortaanukartarnissaat, umiarsuillu sikunik aserorterutit amerlanerit atorlugit tamaanga angalaartarnissaq politiillu amerlanerit tamaanga inissinneqarnissaat Harperip takorloorpaa, nunalli assigiinngitsut akornanni oqaloqatigiittoqarnissaa Mihael Ignatieffip pingaartippaa.
Qalasersuarmik piginnittussaanermik suaarutiginnittut tassaapput Canada, Rusland, USA aamma Danmark, qullersalli aqqutigalugit isumaqatigiinniarnerit aallartisarneqartariaqartut Michael Ignatieffip oqaatigaa:
- Issiaqatigiilluta isumaqatigiinniartariaqarpugut oqarlutalu: Qalasersuaq ukiuni 50-ini tulliuttuni qanoq iliuuseqarfiginiarparput?, Michael Ignatieff oqarpoq.
Sikup issittumiittup aakkiartornera ilutigalugu imaatigut angallanneq annertusiartorpoq, Sullualukkut (Nordvestpassagen) aqqut atorneqaleraluttuinnarluni. Issittumi angallannermut atatillugu isumannaallisaanissaq pillugu inatsisiliortoqartariaqartoq, nunat assigiinngitsut ujartorpaat, Sullualukkulli angallannermut atatillugu inatsisiliortoqartariaqanngitsoq, Canadap attattuarsinnarpaa, nammineq aqutariniaramikku.
