Qalasersuaq kaajallallugu aalisarsinnaaneq oqallisigineqalerpoq
Qalasersuaq kaajallallugu imartami Nunatta avannarpasinnersaata tungaanut, tunisassiassanik suli aalisarfiunikuunngilaq. Tamannami aalisarfiusinnaanikuunngimmat. Maannakkulli sikup aakkiartornerata kinguneranik, ukiut tulliuttut marlussuit ingerlaneranni tamaani aalisartoqarsinnaalernissaa qularnanngilaq.
Qalasersuulli eqqaani kikkut aalisaqqusaanissaat pillugu inatsiseqaranilu malittarisassaqanngilaq, tamannalu ajornartorsiutaalissaaq.
Tamannalu tassa Canadap, USA-p, Danmarkip, Norgep kiisalu Ruslandip sinniisuutitaasa Nunatsinni sapaatip akunnerata tulliani ataatsimiinnerminni oqallisigissavaat. Taakkua aappassaannik ataatsimeeqatigiipput; Washingtonimi siullermik siorna upernaakkut ataatsimiikkamik. Issittup imartaani aalisarneq pillugu isumaqatigiissutaasinnaasumik nunat taakkua suleqatigiillutik saqqummiussaqarnissaat siunertaavoq.
Canadami aalisarnermut ministeri, Gail Shea, canadamiut tusagassiorfiinut oqarpoq, siunissami nungusaataanngitsumik mingutsitsiffiunngitsumillu tamaani aalisalernissap qulakkeernissaanut, ataatsimiinneq periarfissatsialaasoq pingaarutilik. Nunarsuatta avannarpasinnersaani qanoq aalisagaqartiginera qanorlu taakkua allanngorarnerat pillugu nunat naalakkersuisuinut paasissutiissoqarnissaata tungaanut, tunisassiorluni aalisartoqannginnissaa Canadap tapersersorpaa, Gail Shea oqarpoq.
Issittumi aalisarfigineqarsinnaasut nutaat, paasisaqarfigineri naapertorlugit iliuuseqarfigisinnaanerat periarfissillugu, mianersortumik aalisarfigineqarnissaasa aaqqissuunneqarnissaat, Canadap tapersersortuassagaa, taassuma nangilluni oqaatigaa.
Issittup imartaani, silap pissusaata allanngoriartornera ilutigalugu aalisarfigineqarsinnaalersuni, tunisassiorluni aalisartoqanngikkallarnissaa USA-p Danmarkillu isumaqatigiissutigimmassuk taamaalilluni Canada tapersiivoq.
Canadap USA-mik Danmarkimillu tapersiineratigut, taamatut aaqqiissuteqarnissap pisariaqassusaanik nunat allat marluk, tassa Norgep Ruslandillu, paasinnilluarnissaat neriuutigineqarpoq.
