Qalasersuaq eqqartorneqalerpoq
Qalasersuaq pillugu oqallinneq aallartiinnaqaaq. Kalaallit Nunaata Canadallu akornanni immap naqqani nunavimmut atasortap killinga pillugu piumasaqaatinut Canada aamma Kalaallit Nunaat, taamaalillunilu Danmark, tapersoqatigiissanersut pissanganarsivoq.
Canadamiit Kalaallit Nunaannit/Danmarkimit sikuiuitsumut ilisimasassarsiortartut naapittussanngorput, Ellesmere Islandip avannaatungaani sapaatip akunnerini arfinilinni upernaaq sulisimaneq oqallisigissallugu.
Sila taamanikkut, tassa upernaaq, eqqorneqarluarpallaarsimanngikkaluartoq, Kalaallit Nunaata Canadallu akornanni immap naqqani nunavimmut atasortap killinganut paasissutissanik ilisimatuut annertuumik katersipput.
- Canadamiut sapaatit akunneri arlalinnguit qaangiuppata naapissavavut, isumaqatigiippugullu misissuinitsinni sumut killissimanerput allanut oqaatiginngikkallarniarlugu, kisianni Kalaallit Nunaata Canadallu akornanni immap naqqani nunavimmut atasortap killingata qanoq inneranut paasissutissat atorfissaqartitavut pigaavut, Danmarkimi Kalaallit Nunaannilu ujarassiuutut misissuiffimmi, GEUS-imeersoq, Trine Dahl-Jensen, oqarpoq.
