Qalasersuaq danskinit oqartussaaffigineqassanerpoq
Nunat avannarliit ministeriisa ataatsimeeqatigiinnerat qimanngikkallassavarput – Svalbardimi ataatsimeeqatigiinnerup nalaani tusagassiortunik katersortitsinermi danskit ministeriunerata Qalasersuup danskinit oqartussaaffigineqarnissaa eqqaallatsiarsimavaa.
Norgemiut tusagassiortut Anders Fogh Rasmussen aperisimavaat, Qalasersuaq pillugu danskit naalakkersuisui qanoq eqqarsarsimanersut.
Taavani pinngortitap tunniussinnaasai nunanit arlalinnit soqutigineqalersimammata taama apeqquteqartoqarsimavoq.
Anders Fogh Rasmussenip apeqquteqaat quiasaarnerulluni akisimavaa oqarluni:
- Kalaallit Nunaannut ilanngullugu Qalasersuaq oqartussaaffigissallugu, danskit naalakkersuisuisa soqutigaat, taavanimi danskit erfalasuat aamma erfattoq takuneqarsinnaaniassaaq.
