Qalasersuaq aasaanerani siullerpaamik kaajallanneqarpoq

Qalasersuarmik kaajallaasut tassaapput norgemiu Børge Ousland taassumalu angalaqatai allat pingasut. Taakkua angallatiminnik glasfiberimik sanaajusumik 31 fodsitullu angissusilimmik Kangimut Aqqutikkooriarlutik Sullualummut ippassaq anngupput.

Ilisimasassarsiortut juunip 23-ani Oslomiit aallarput, ippassarlu Sullualummiittumut Tallorutip Imartaanut apuullutik. Taama nrk.no allappoq.

Ilisimasassarsiornermi aqutsisoq Børge Ousland oqarpoq, ilisimasassarsiornerminni silap allanngoriartornera ersersikkusukkitsik.

- Ilisimasassarsiornitsinni ersersikkusupparput Issittumi pissutsit qanoq allanngortigineri aammalu qanoq sukkatigisumik allanngoriartorneri, Ousland nrk.no-mut oqarpoq.

Taanna ilanngullugu oqarpoq Issittup sikuata ukiuni kingullerni sukkasuumik allanngoriartornerata kinguneranik Kangimut Aqqutikkoorluni Sullualummut aasap ingerlanerani apuuttoqarsinnaalersimasoq.

Ilisimasassarsiortut Tallorutip Imartaata kujataatungaani nunaqarfimmi Mitsimatalimmeereerunik Nuup tungaanut angalanertik nangillugu aallassapput, Nuummullu tikissangatinneqarlutik oktoberip aallaqqaataani. Tamaaneereerunik ilisimasassarsiornertik nangillugu Norgemut ingerlaqqissapput.