Qalasersualerngusaannertik unitsikkallarpaat
Canadamiut sikunik aserorterutaat aasaanerani Issittup imartaanukartinneqassapput, imartap Canada Basin-imik taaguutillip misissuiffigineqarnissaa pingaarnertut anguniarneqarluni.
Imartaq Canada Basin Beaufortip Imartaata aamma Ualerngup tarajuanik taaneqartartup avannaatungaaniippoq.
- Imartaq misissuiffigineqartussaq Banks Islandip kimmut avannaatungaaniippoq, taamaammat avannarpasissumiittussaassaagut, Michael Gardiner, Canadap killeqarfiini nakkutilliisuneersoq oqarpoq.
Naalagaaffiit Peqatigiit immat atorneqarnerat pillugu isumaqatigiissutaat naapertorlugu, nunat imartaminnut nunamit 200 sømilit tikillugit avasissusilik tikillugu oqartussaasinnaapput.
Issittup imartaani uuliaqarsinnaanissaa gasseqarsinnaanissaalu ilimagineqarmat imartamik piginnittussaaneq nunanit assigiinngitsunit pingaartinneqarpoq.
Naalagaaffiit Peqatigiit immat atorneqarnerat pillugu isumaqatigiissutaat 2003-mi Canadamit akuersissutigineqarpoq, USA-li isumaqatigiissummik suli akuersissuteqanngilaq, taamaattorli Issittup imartaani ilisimatusarnikkut misissuinermi peqataalluni.