Qajaq USA katerisimaartitsivoq

Kalaallit Nunaanniinnaanngitsoq, aammali nunani allani, qajartorneq soqutigineqarpoq, soorlu qajartortarneq qaanniortarnerlu pillugit USA-mi uani sapaatip akunnerata naanerani naapeqatigiittoqartoq.
oktobarip 07-at 2007 16:45

USA-mi aamma peqatigiiffeqarpoq, Qajak USA-mik taaguutilimmik, peqatigiiffiullu taassuma Kalaallit Nunaanni Qaannat Kattuffiat suleqatigaa. Issittumi qaanniortarnerup qajartortarnerullu sukumiisumik ilinniarneqarnissaa Qajaq USA-p suliniutigaa.

Amerikami peqatigiiffik ukiumut ataasiarluni annertuumik ulluni pingasuni katerisimaartitsisarpoq. Katerisimaarneq taanna naalagaaffimmi Camp Arrowhead-imi pivoq, qajartortartut qaanniornermillu soqutigisallit 120-t tamatumuuna peqataapput. Paarneq qajartorsinnaanerlu sammineqarnerusarput, kalaallit qajartoriaasiat aallaavigineqarnerusarluni.

Camp Arrowhead-imi katerisimaartoqarnerani takutitsisoqassaaq, kalaallit qajartoriaasiat qaannioriaasiallu ilinniartitsissutigineqassalluni. Oqallittoqassaaq, filminik takutitsisoqarluni unaamillu atuinissamut aamma takutitsisoqassaaq.

Kalaallit qajaat amerikamiunit soqutigineqartorujussuupput, qaannanilli nunanit allaneersunik, soorlu qaannanik Labradorimeersunik ilaatigut aamma saqqummersitsisoqassaaq.

Qajak USA-p siulittaasua Ed Zachowski, Radioavisimut oqarpoq, kalaallit qaannioriaasiat malinnaavigalugu imaannaanngitsuusoq, aamma Qaannat Kalaallit Nunaanni Kattuffiannut ilaasortaanini assut nuannaarutigigini.