Qajaq Nuuk ukiut arfinilissaat pokalimik ingerlaartumik tulaassivoq

Peqatigiiffik Qajaq Nuuk inersimasuni angusarissaarnerpaatut pokalit ingerlaartut tulleriit marluk pigilivippai.

Tamanna pivoq qaannat unammersuarnerat Ilulissani tallimanngormat naammassimmat sapaatip akunnera unammeriaatsini assigiinngitsuni unammisaqattaartoqareersoq. Angusat najoqqutaralugit peqatigiiffiit pointilersorneqartarput. Peqatigiiffik Qajaq Nuuk tassani inersimasuni angusarissaarnersaavoq.

- Ukioq kaajallallugu sungiusartuartarpugut aammalu ukiukkut naluttarfimmi sungiusartarnerput iluaqutigilluartarlugu. Unammeriaatsini assigiinngitsuni tassani sungiusarsinnaasarpugut, Qajaq Nuummi siulittaasoq Pavia Tobiassen KNR-mut oqaluttuarpoq.

Qajaq Nuuk inersimasuni peqatigiiffinni angusarissaarnerpaatut pokalimik ingerlaartumik ukiut arfinillit tulleriisillugit ajugaasarnermigut pokalinik ingerlaartunik tulleriinnik marlunnik pigisaqavissortunngorpoq.

Ataasiakkaarnermi ajugaasut

Meeqqat angusaat katinneqarmat Peqatigiiffik Qajaq Qaqortoq ajugaasuuvoq.

- Taakku meerarpassuarnik pikkorissunik peqataatitaqarput. Uagut ilaasortatsinni meeqqat peqataasut amerlanngillat naak meerarpassuit ukioq kaajallallugu sungiusartaraluartut, Pavia Tobiassen oqaluttuarpoq.

- Ilaasortavut arlalippassuit pissartanngorniunnissamut peqataaniaratik aalajangernikuupput, oqaatsini ilavai.

Ataasiakkaatut unamminermi aamma pointit katinneqartarput.

Tassanissaaq Peqatigiiffik Qajaq Nuuk nuannaarutissaqarluarpoq tassani ilaasortaasoq Angerlaq A. Olsen pointit katinneranni arnani qajartullammanngorami.

Kunuunnguaq Davidsen Qajaq Sisimiuneersoq angutit angusaat katinneqarmata qajartullammanngorpoq.

Qaannat unammersuarnerat aappaagu aamma Ilulissani pissaaq.