Qaffasinnerusumik ilinniagallit qiortartakkamik tunineqartalissapput

Qaffasinnerusumik ilinniagalinnut qiortartakkanik ingerlatsineq ukioq manna aggustip aallaqqaataani nunatsinni atorneqalissaaq.

Taamaalinikkut qaffasinnerusumik ilinniagaqarnermik aallartitsisut killissarititamik qiortartakkanik 82-inik imalimmik tunineqartalissapput.

Qiortartakkap ataatsip qaammammi ataatsimi ilinniagaqarnersiuteqarnerup aammalu meeqqanut tapisiaasinnaasut assigai.

Ilinniarfissap sivisussusaa ilutigalugu qiortagassat aalajangerneqartarput. Assersuutigalugu ilinniagaq ukiunik marlunnik sivisussuseqarpat qiortagassanik 24-nik tunisittoqartarpoq.

Ilinniakkamilli kingusinaarussisoqarpat ilinniarneq qiortartakkamik tapiliutinik aqqaneq-marlunnik, tassa ukiumik ataatsimik, sivitsorneqarsinnaavoq.

Qiortartakkalli amerlassusaat immikkut illuinnartuni annertusineqarsinnaavoq. Soorlu bacheloritut kandidatitulluunniit ilinniarnernut piffissarititaasutut aalajangiussat 60-iusut sinnerlugit sivisunerugaangata.

Killissarititaasoq annertusineqareersimatillugu ilinniaqarnermillu unitsitsisoqarsimappat killissarititap annertusineqarnera atorunnaarsinneqasssaaq.

Tamannali allatigut aamma allangortinneqarsinnaassaaq. Ilinniagaqartup uppernarsaateqarneratigut nappaateqarneq imaluunniit pissutsit immikkut ittut allat pissutigalugit ilinniagaqarnermik naammassinnissinnaannginnerani taamaattumillu soorlu ilinniagaqarnermut nutaamut nuunnerani.

Ilinniartup meerartaarsimappat meerarsiartaarsimappalluunniit tapisiaqalersinnaassaaq, ilinniarnermut tunngatillugu qiortartakkat saniatigut.

Ilinniagaqartup nammineerluni qiortartartakkamik pisannginnissani qinigarisinnaavaa.