Qaatsiartaatip unittup taartaa akisussaaq

septembarip 13-at 2006 14:57

Uummannami qaatsiartaat atuleraluaannaq ajutuuginnaleqimmat unitsiinnarneqarpoq. Uummannap nunaqarfiisa Qaarsullu akornanni qulimiguulik massakkumiit atulissasoq, Angallannermut naalakkersuisoq Jørgen Wæver Johansen Uummannallu kommunea aalajangerput.

Kisianni sooruna massakkut aatsaat aalajangertoqartoq? Jørgen Wæver Johansen ima akivoq:

- Siunnerfeqarluta suliniarnitsinnut naalakkersuisuniit tunngavigaarput, innuttaasut ukiuni tulliuttuni angalaniarnikkut sapinngisamik atasinnaasumik aaqqiivigineqarnissaata isumannaarneqarnissaa.

Qaatsiartaammut unittumut taarsiunneqarpoq timmisartoq qulimiguulik. Taanna soorunami akisunerungaatsiarpoq, ukiumut 10 millioni koruunit pallillugit akeqassalluni, aaqqiinerlu nunatta karsianit akilerneqassanersoq Inatsisartut aalajangerumaarpaat, Jørgen Wæver Johansen oqarpoq.

Qaatsiartaatip iluatsinngitsoornera KNI-mut kinguneqartinneqassanersoq aperigatsinni akivoq: -Massakkut oqaaseqarfigisinnaanngilara, kisianni eqqaamassavarput neqeroortoqarmat neqeroorummullu akuersisoqarmat.

Taamaattumik Namminersornerullutik Oqartussat pisumi akisussaaqataanerat aamma nassuerutigisariaqartoq, Jørgen Wæver Johansen oqarpoq.

Uummannami qaatsiartaammut atorunnaartumut KNI ingerlatsisuuvoq.