Qaatsiartaatip tulaffissaa puttasoq sanavaat

novembarip 23-at 2005 10:58

Uummannami qaatsiartaatip angerlarsimaffeqarnissaa anguniarlugu, Pilersuisoq maanna Aasianni puttasumik sanatitsivoq.

- Qaatsiartaat tulassinnaassappat, nunamullu tulaffissaqarnanilu imaq kassoqarpallaarpat, puttasumik sanatitsisariaqarsimavugut, Pilersuisup pisortaa Gerhardt Petersen oqarpoq.

Tamannali Uummannami borgmesterip Jens Lars Fleischerip ilisimannginnerarpaa.

- Pilersuisumit allagarsivugut, Air Greenland 2006-imi marsip naanerata tungaanut Uummannami qulimiguulimmik kiffartuussinissaa isumaqatigiissutigineqarsimasoq. Akissut naammaginngilarput, Pilersuisumullu utertipparput, Jens Lars Fleischer Radioaviisimut oqarpoq.

Akissutip taassuma utertinneqarnera Pilersuisumi Gerhardt Petersenip tigusimalereerpaa.

- Suleqatikka tamatuminnga suliaqartut peqatigalugit piffissami qaninnerpaami tamanna ataatsimiissutigissavarput, Gerhardt Petersen oqarpoq.

Taanna aamma aperaarput, illoqarfinni allani qaatsiartaateqarumaarnersoq.

- Qaatsiartaatip Uummannamiittussap atugaanera takoreerutsigu kingorna nalilersuissaagut, Gerhardt Petersen oqarpoq.