Uummannami qaatsiartaatip atorneqalernissaa kinguartinneqarmat Uummannami takornariaqarnermik sullissisut nuannaarutigiinnarpaat.
KNI-p qaatsiartaataa Uummannami atorneqalernissaminut imarsiornermut qullersaqarfimmit angallassisalernissaa itigartitsissutigineqarpoq, angallassisalernissaalu aasamut kinguartinneqarluni. Uummannami takornariaqarnermut sullissisisut tusarlugu qujamasupput:
-Aallarteriarnerigalua tamarmi unittoortinneqartoq assut qujamasuutigivara, pissutigalugu assigiinngitsutigut maani takornariaqarnermi suliaqarnitsinni kipilittunartorujussuarmik inissitsimmatigut. Siullermik qaatsiartaatip piareersarneqarnera kipiluttunarsimavoq. Tassani inniminniisinnaanerit qaatsiartaammut taavalu angalanissanut fartplan-it suliarineqarsimannginnerat kingunerilersimallugu takornarissat maanga Uummannamut tikittussaagaluit allaat uneralereersimallutik, Elisabeth Fleischer Uummannap Hoteliani saaffiginnittarfimmi pisortaasoq oqarpoq.
Ukioq aallartimmat takornariat 13-it Uummannaliartussaagaluit uniinnarput massakkullu pingasut aamma uniinnarnissartik eqqarsaatigaat, nalugamikku Uummannamut aqqutissat qanoq innersut. Takornariartitsisut asamut amma ernumapput:
-Soorunami maani Uummannami takornarissat ukiup siuliininngaanniit ikileriarujussuarnikuupput. Taava soorunami aamma qaatsiartaatip aallartisarneraninngaanniit fartplaneqannginnera aallaavigalugu soorunami takornarissat maanga tikinniartut unissinnaasut suli amerlanerusinnaanerat takorloorsinnaavarput, Elisabeth Fleischer oqarpoq.
Elisabeth Fleischer-ip Uummannap kommunalbestyrelsianut aamma ilaasortaasup ernummatigaa Uummannap kommunianut kingunerlussinnaanissaa:
-Illoqarfik ataatsimut isigalugu takorloorsinnaavarput annertujaamik takornariaqarnermut tunngatillugu aningaasanik isertitaqarsinnaasaraluartoq, takornariaqartinnaguli aningaasat isaasussaagaluit taamaalillutik annaassavagut. Minnerunngitsumik innuttaasunut akornanni aamma apeqquterparujussuit pilernikuupput: ”Qanormi ililluta uagut ingerlariaqqissaagut nunaqarfigisatsinninngaanniit illoqarfimmukarniarutta”, Elisabeth Fleischer oqarpoq.
KNI-mi pisortaaneq Gerhardt Petersen oqaaseqartinniaraluaratsigu ulloq naallugu KNI-p siulersuisuini ataatsimiimmat oqaaseqartissinnaasimanngilarput.