Qaatsiartaanngooq qanoq ilillugu atorniarpaat?

Qaatsiartaat Uummannap nunaqarfiini atorneqalerpat, qanoq isumannaatsigissanersoq Uummannarmiut nalornissutigaat.

Air Greenlandip qulimiguujutaata Uummannap kommuniani suli timmisartuussinissaa pilersaarutigineqarpoq. Qaatsiartaallu aamma ilaasunik assartugassanillu useqartassasoq pilersaarutaalluni.

Taamatuttaaq naatsorsuutigineqarpoq qaatsiartaat, Uummannap nunaqarfiini napparsimasoqartillugu Uummannami napparsimaviliaassassanut, aammalu imaatigut ajutoorsimasunik ujaasisoqartillugu atorneqartassasoq, taama KNI-p pisortaa Gerhardt Petersen qulakkeerinnippoq.

Taama angallannikkut pilersaaruteqarneq Uummannarmiunit toqqissisimajunnaassutigineqarpoq. Ilaatigummi Uummannami atuisartut ataatsimiititaliaat allagaqarlutik apersuutigaat, tamanna ukiumi nutaami apriilip aallaqqaataata tungaanut qanoq ililluni ingerlanneqassanersoq.

Apeqqutillu pingasut ilaatigut makkuusut apeqqutigalugit; Pisiassat akiinut angalanermullu akinut qaatsiartaateqarneq sunniuteqassava? aammalu napparsimasunik angallassissutaalluarsinnaava? ajutoorsimasunillu ujaasinermi atorneqarsinnaava?.

Tamatumunngali Gerhardt Petersen ernumaqqusinngilaq.

Ukiortaallu kingorna inuit Uummannamiit utimullu aammalu nunaqarfinnut angalasaqattaakutsoorsinnaasut, Gerhardt Petersenip oqaatigaa.