Qaatsiartaammik anginerusumik piniartoqarataannaaavoq

KNI-p Uummannap eqqaani qaatsiartaatitut atulersitaa maanna angallassilluni aallartereersoq mikivallaarpoq! Imarsiornermi Qullersaqarfiup piumasaa naapertorlugu inunnut aqqaneq-marlunnut inissaqarpoq. Taakkuli amerlavallaarmata nerisassanut poortukkanullu inissaqartitsinngilaq.

Umiarsuaateqarfiup pisortaa Nikolaj Ananiassen ima oqarpoq.

- Aatsaat aallarterlaajugami mikivallaarnera suli iluamik malunnarsinngilaq. Kisianni Uummannamiit Qaarsuarsunni timmisartumut ilaajartortussat, aatsaat amerlappata, 24-t sinneqarpata, mikivallaartutut aatsaat nalilersinnaalissavarput, Nikolaj Ananiassen oqarpoq.

Nikolaj Ananiassen erseqqissaavoq qaatsiartaatip, Ilimmartaammik maanna atserneqarsimasup, mikivallaarnera aallaqqaammulli ilisimagitsik. Siunertaaqqaarsimagaluarporlu Uummannamiit Uummannap nunaqarfiinut nerisassanut assartuutitut atugaassasoq, kingusinnerusukkulli aatsaat Namminersornerullutik Oqartussanit siunnersuutigineqarpoq inunnik aamma ilaasoqarsinnaasariaqartoq. Taamaalimmat Imarsiornermik Qullersaqarfik piumasaqaateqartariaqarmat suut tamarmik kinguartoortariaqarsimapput.

- Massakkut aasaanerani misilittariarlugu qaatsiartaat qanoq ingerlanersoq ukiariartulerpat nalunaarusiussaagut. Nalunaarusiami mikivallaarineqassappat taava anginerumaamik piniarnissarput pisariaqalissaaq, Nikolaj Ananiassen oqarpoq.

Taanna erseqqissaavoq Qaatsiartaammut ilaasunut bilitsip akia qaffaqqissanersoq Namminersornerullutik Oqartussat aalajangigassarigaat.