Qaatsiartaammik angallattalernissaq

Qaatsiartaat Uummannap nunaqarfiinut januaarimiit angallassissutaalertussaasoq arlaleriarlugu Pilersuisumiit oqaatigineqartarpoq.

Sulili tamanna qularnarallarpoq, tassami qaatsiartaat Imarsiornermik Qullersaqarfiup akuerissaneraa akuerissannginneraaluunniit suli nalunarmat.

Pilersuisumi umiarsuaateqarfiup pisortaa Nikolaj Ananiassen oqarpoq, qaatsiartaatip qanoq angallatigisarnissaa pillugu, Tuluit Nunaanniit pikkorissaajartortumik februaarip aallartinnerani tikittoqassasoq. Pikkorissarneq sapaatit-akunnerini pingasuni ingerlanneqassaaq, pikkorissartitsisuussappullu qaatsiartaammik sanaartortuusimaasut.

- Qaatsiartaammik ingerlatsisartussat minnerpaamik umiarsuarmi naalakkatut ilinniarsimassapput, inuillu marluk atorfinitsinneqartussaapput. Pikkorissarnermili taakku taartissaat aamma pikkorissartinneqassapput, Nikolaj Ananiassen oqarpoq.

Pikkorissartitsineq naammassippat Danmarkimi Imarsiornermik Qullersaqarfimmiit tikittoqassaaq, taakku nalilissavaat, qaatsiartaat akuerineqassanersoq akuerineqassannginnersorluunniit.

Nikolaj Ananiassenip erseqqissaatigaa, Imarsiornermik Qullersaqarfiup piumasai sakkortusartut, taamaattorli qularutiginnginnerarpaa, qaatsiartaatip akuerineqarnissaa.

Qaatsiartaat taama ittoq Danmarkimi atugaanngilaq, Sverige-mili Finland-imilu aammalu Canada-mi atugaalluni.