Qaasuitsup Kommuniata Naalakkersuisunit ukiortaami kissaatai
- Aningaasat ineriartortitsissutissat nassaarineqassappata kommunip iluarsartuunneqarsimanerata nutaamik nalilersorlugu ilusilersoqqinneqarnissaa pisariaqarpoq, Ole Dorphip ukiortaami oqalugiaataani, Qaasuitsup Kommuniata nittartagaatigut ippassaq saqqummersinneqartumi ilaatigut atuarneqarsinnaavoq.
Naalakkersuisunngortut naalakkersuisoqatigiinnissamik isumaqatigiissutaanni ilaatigut aamma takuneqarsinnaavoq Qaasuitsup Kommuniata avinneqarsinnaanissaa misissorneqassasoq, tamannalu Qaasuitsup Kommunianut piumaffiginnippoq kommunip qanoq avinneqarnissaanik siunnersuusiussalluni, Ole Dorph oqarpoq.
Ingerlatsinikkut killiffiit aallaavigalugit aamma nalimmassaasoqaqqissaaq, assersuutigalugu inunnik isumaginninnerup ataani sullissineq nalilersorneqassalluni, assigiimmillu malittariassaliortoqassalluni.
Ole Dorphip ukiortaami oqalugiaataani aamma atuarneqarsinnaavoq Qaasuitsup Kommunia Naalakkersuisunit kissaateqartoq, tassami Ilulissani mittarfiup allilerneqarnissaata sulissutigineqarnissaa kissaatigineqarmat:
- Qaasuitsup Kommuniata Naalakkersuisunut, Inatsisartunut kommunillu allanut kivitseqatigiillutik Nunatta aningaasaqarnerata ineriartortinneqarnissaa innuttaasunut, politikerinullu kaammattuutigaa, timmisartoqarfiup allilerneqarnissaanik suliaq ikorfartoqqullugu aalajaatsumik sinaakkuteqarluni pilersaarusiorneq ingerlassinnaaqqullugu, Qaasuitsup Kommuniani borgmesterip Ole Dorphip ukiortaami oqalugiaataani ilaatigut atuarneqarsinnaavoq.
