Qaasuitsup Kommuniata avinneqarsinnaanissaa Kanukokap apeqquserpaa

Qaasuitsup Kommuniani amerlanerussuteqartut kommunip avinneqarnissaa kissaatigaat, Kanukokalli siulittaasuata Martha Abelsenip tamanna eqqarsarnartoqartippaa.
Martha Abelsen Assi © : KNR
Allattoq Mads Lynge
maajip 18-at 2014 16:13

Kommunit ukiut tallimat matuma siornatigut aaqqissuuteqqinneqarmata, Namminersornerunerup eqqunneqarneraniilli ingerlatsinikkut aatsaat taama angitigisumik pisoqarpoq. Kanukokap siulittaasua Martha Abelsen, Siumumeersoq, taamaammat isumaqarpoq kommunit sisamat suli atuutsinneqartariaqartut:

- Kommunit ukiuni tallimani atuutereerlutik soorunami suli inissivissimanngillat, Martha Abelsen aviisimut Sermitsiamut oqarpoq.

Qaasuitsup Kommuniata avinneqarnissaa pillugu apeqqummut Qaasuitsup Kommuniani politikerit utaqqeqqaartariaqartut, taassuma kajumissaarutigaa. Kommunimmi avinneqarsinnaanissaa pillugu maannangaaq aalajangertoqartariaqanngitsoq taanna isumaqarpoq:

- Kommuninik aaqqissuusseqqinneq eqqunneqarpoq annertuumik peqqissaartumillu piareersaalluni sulinerup kingorna, ullumikkullu kommunit atasinnaanngitsutut oqaatigeriissagutsigit sumilluunniit uppernassuseerutissaagut, Martha Abelsen, Sermitsiamut oqarpoq.

Qaasuitsup Kommuniani kommunalbestyrelsimi amerlanerussuteqartut, Martha Abelsenip parteeqataanit Siumumeersut matumani pingaarnertut inissisimallutik, kissaatigaat Qaasuitsup Kommunia avinneqassasoq.