Qaasuitsup Kommuniata avinneqarnissaa inuussutissarsiornermut akornutaassaaq

Inuussutissarsiutit taakku marluk ineriartorteqqinneqassappata avataniit aningaasaliisoqarnissaa pisariaqarluinnarpoq, tamakkununnga aningaasaliinissamut nunatta karsiata aningaasarpassuaqanngimmat. Kommunimi ineriartuutaasinnaasut ilaat tassaapput Ilulissani mittarfiup tallilerneqarnera, Qeqertarsuarmi puilasut kissartut atorluarneri kiisalu Uummannami, Upernavimmi, Savissivimmi Qaanaamilu umiarsualiviit allileriffigineqarnissaat.

-Kommunitut   sassartariaqarpugut   tunulequtaalluta,  aningaasanik  avataaviit   atorniarnissamut.   Aningaasanillu   atukkerneqassagutta,   kommunitsinni   pisuussutit  aalisakkat  qanoq   annertutigisut  tunisassiarineqarsinnaaneri   nalilersuutaassapput,  aatsitassanik  tunisassiulersinnaanermut  periarfissat   naliliiffigineqassapput,    imermik  avammut  niuilivissinnaanerput  nalilerneqassooq   kiisalu  takornariartitsinikkut  periarfissarititagut  naliliiffigineqartussaallutik.     Minnerunngittumillu    kommunep   innuttai   suliassanik  kivitsisinnaasut  qanoq  amerlatigineri,     aningaasanik  atukkiiniarnermi   nalilersuutit  pingaartut  ilagissuaat, Bernhardt  Olsen, Siumut sinnerlugu kommunimut qinigassanngortittoq oqarpoq.

Aningaasanik taarsigassarsisarfinni aningaasanik pissarsisoqassappat taarsigassarsisitsisartut tatiginassuseqarneq kommunimilu sulisinnaasut taarsigassarsinermi aningaasaliiffiginiarneqartumut kivitsisinnaanersut misissoqqaassaavaat. Tamatumanilu kommunip kommuninut mikinerusunut pingasunut avinneqarnissaa toqqaannartumik akornutaalissaaq. Taamaaliornikkut aningaasaleerusuttunik soqutiginnilersitsisoqarsinnaanngilaq, taamalu aamma kommunimi inuussutissarsiornerup pitsaasumut saatsinniarnissaanut iluaqutaassanani.

- Qaasuitsumi  Kommunejuvugut   nunarsuarmi   annersaaginnarnata  aamma  pisuussuteqarnersaasoq -  pisuussutigulluukua   atorlualerniarlugit ataatsimoortariaqartugut  aamma   kommunenut   allanut  unammillersinnaaneq  eqqarsaatigalugu.     Namminersorlutik   oqartussat  allaffissornerisa  ilaanit  tigusissagutta  aamma  kommune  agisuujugutta,  tigusinissarput  ajornannginnerussooq, Bernhardt Olsen oqarpoq.