Qaasuitsup Kommuniata atuartitsiffiussanik sipaaruteqarniarnera atorunnaarsinneqarpoq
Qaasuitsup kommuniata aningaasatigut sipaarniarnermut atatillugu atuarfinni akunnerit atuartitsiffiusut procentinik 15-nik ikilisaaniarnera atuarfinni inatsimmik unioqqutitsinera Ilinniartitaanermut Naalakkersuisoqarfimmit aamma ilinniartitsisut meeqqat atuarfianeersut kattuffiannit IMAK-imit piffissami kingullermi isornartorsiorneqarpoq.
Qaasuitsup kommuniani kukkusoqarsimanera uppernarsarneqarluni ajuusaarutigineqarpoq.
Aamma atuaruk linniartitaanermut Naalakkersuisoqarfik: Qaasuitsup kommuniata atuarfeqarnermut inatsit unioqqutippaa
Qaasuitsup kommuniani atuartitaanermut kultureqarnermullu ataatsimiititaliami siulittaasoq Kristian Broberg
atuartitsinerit 15 procentinik ikilisaaffigineqarnissaannut kommunalebestyrelsemi novemberimi aalajangiiffgineqarnerani napparsimalluni ataatsimeeqataanngilaq.
- Ajuusaarnartorujussuuvoq taamanna aalajangertoqarsimammat, kisianni tamanna qimaafigisinnaanngilara, ikilisaanissamik aalajangernermi napparsimallunga ataatsimeeqataannginnama, taamalu pisoqqaqqittoqartariaqarani,
Kristian Broberg taama oqarpoq.
Aamma atuaruk :IMAK-ip isornartorsiuinera Qaasuitsup pimooruppaa
Kultureqarnermut, Atuarfeqarnermut Sunngiffimmullu ataatsimiititaliami siulittaasoq aamma Qaasuitsup kommuneani borgmesterip oqaloqatigiinerisa kingorna Qaasuitsup kommuniani atuartitaanermut kultureqarnermullu aqutsisoqarfik suliakkerneqarpoq atuartitsissutigineqartussat 15 procentinik ikilisaaffigineqarnissaanik aalajangerneq atorunnaartoq.
- Ullaaq aqutsisoqarfimmut naalakkiutigineqarpoq, atuartitsissutigineqartussat 15 procentinik sipaarutigineqarnissaanik 1 august atuutilersussatut aalajangersimaneq atorunnaarsinneqartoq, Krisitan Broberg oqarpoq.
Qaasuitsup kommuniani atuarfeqarnermi pissutsit pitsanngorsaavigineqarnerani atuartitsinernik ikilisaaniarluni aalajangersimaneq akuersaarneqanngilaq.
Qaasuitsup kommuniani Kultureqarnermut, Atuarfeqarnermut Sunngiffimmullu ataatsimiititaliami siulittaasutut akuersarsinnaanngilluinnarpara aamma nuanninngilaq taama pisoqarnera, meeqqat atuartinneqartut pitsanngorsaaviginiartillugit killormut aalajangiisoqarsimanera akuersaarneqarsinnaanngilaq, oqaaseq sakkukipporluunniit taanna, Kristian Broberg taama oqarpoq.