Qaasuitsup Kommuniani taasinngitsoortut amerlapput

Kommunalbestyrelsemili illuatungiliuttut gruppianni siulittaasup tullia Ane Hansenip tupaallaatigaa. Taasisut 48 procentii taaseqataannginnerat nalornissuteqarsimasinnaaneranut pissutaasoraa.
 
- Naatsorsuutigisanniik taasinerup peqataaffigineqarnera annikinnerunaarpara. Naatsorsuutigisimagaluaratsigu 60-70 procentit tungaanut taasititsineq peqataaffigineqassasoq. Taassuma takussutissartarisinnaavaa inuit suli nalornisut amerlasoorujussuusut. Kisianni angerlutik taasisussat naatsorsuutigikannertut ipput, tassa 80-85 procentit angerlutik taasinissaat naatsorsuutigikannernikuugaluaratsigu, kommunalbestyrelsimi ilaasortaq Inuit Ataqatigiinneersoq Ane Hansen oqarpoq.
 
Ane Hansenip taasititsinissap kinguartinneqarnissaa kissaatiginikuugaluarpaa, paasissutissanik amerlanerusunik saqqummiisoqarnissaat kissaaatigalugu, innuttaasunik paatsiveeruttoqarnissaa taamaalillugu pinngitsoortikkumallugu.
 
Qaasuitsup kommuniani kommunalbestyrelsemi Siumumeersoq Palle Jeremiassen isumaqarpoq kommunip avinneqarnissaanut taasiartortut affaannaanerat nalornissutissaanngitsoq.
 
-Isumaqarpunga innuttaasut affaannaanik oqalunneq illuatungilerneqartariaqartoq. Innuttaasut tamarmik periarfissinneqarput. Tassanilu aamma innuttaasut periarfissineqartut 52 procentii peqataapput, Palle Jeremiassen  oqarpoq.
 
Taassumali isertunngilaa taasiartortut amerlanerunissaat ilimagisimagaluaramiuk:
 
- 60 procenti missaaniinnissaa naatsorsuutiginikuuara. Inunnut ataasiakkaanut una qinersinerunikuunngimmat. Taamaattumik ajorinngilluinnarpara innuttaasut affai sinnerlugit taamatut taasimmata aamma taama ersaritsigisumik oqariartormata, Qaasuitsup Kommuniani kommunalbestyrelsemi ilaasortaq siumumeersoq Palle Jeremiassen oqarpoq.
 
Taanna isumaqarpoq innuttaasut oqariartornerat malinneqartoq, innuttaasullu taasillutik isumaat ataqqineqartariaqartoq.
 
- Innuttaasut ersarilluinnartumik oqariartorput. Kommunip aaqqissuussinera iluarinngilarput. Innuttaasut sumiiffitsinniit nammineq ilusilersuillutalu pingaarnersiuerusuppugut. Aamma taanna oqariartuutitsinni pingaarnerpaanikuuvoq taanna angorusullutigu, Palle Jeremiassen oqarpoq.
 
Qaasuitsup Kommuniani innuttaasut amerlanerussuteqartut - 79 procentii - Kalaallit Nunaanni kommunit annersaata avinneqarnissaanut angerput. 21 procentillu kommunip avinneqarnissaanut naaggaarlutik.
 
Angertut kisitsisinngorlugit 5.135-iupput. 1.366-it naaggaarlutik.

6.000-it sinnilaarlugit taasiartorsimanngillat.