Qaasuitsup Kommuniani soorarsitsisoqassaaq
Aasaanerani sulinngiffeqarnissaq sioqqutilaarlugu Qaasuitsup Kommuniata nalunaarutigaaa, kommunimi sulisut 80-it soraarsinneqartariaqassasut. Aningaasaqarnerulli misissoqqissaareernerani soraarsinneqartussat taama amerlatigissanngitsut paasineqarpoq.
- Ilisimavarpulli aamma ukioq nutaaq aallartippat feeriaqarnersiutitsinik allanillu akiliisoqartussaasoq, aappaattullu aamma kommuni aningaasaqarniarnikkut annertuumik ajornartorsiulertussaassalluni. Taamaammat isumaqarpugut kommunip karsimiittuutai ukioq naappat ikinnerpaamik 60 millioner koruuniusariaqartut, Qaasuitsup Kommuniani bogmesteri, Ole Dorph, taama oqarpoq.
Naatsorsiunerit naapertorlugit kommuni ukioq naappat 40 millioner koruuninik karsimiittuuteqassaaq. Ukiumullu nutaamut 60 millioner koruuniuteqarnissamik anguniagaq anguneqassappat, kommuni 23 millioner koruuninik sipaaruteqartariaqassaaq.
- Siunnersuut ataatsimiititaliamut suliassanngorlugu ingerlateqqinneqarpoq. Tullia kommunalbestyrelsip ataatsimiinnissaanut piareersimanissaa neriuutigaarput, Ole Dorph oqarpoq.
Sulisunik 80-inik soraarsitsoqarnissaa eqqarsaataajunnaareersoq naqissuserpaa. Kommunit 2009-mi kattussuunneqarmata suliffiit 29-t atorunnaarsinneqarnissaannik oqaluttoqaraluarpoq. Taakkulu sipaarniarnissamik pilersaarusiornermut atatillugu oqallisigisassatut qaqqinneqarput.
- Maanna eqqartoqqinneqalerput. Ataatsimiititaliap susoqassanersoq misissussavaa periarfissallu assigiinngitsut isummerfigalugit. Atorfinnut tunngatillugu qanoq aalajangiisoqarumaanera maannakkorpiaq oqaatigisinnaanngilara, borgmesteri oqarpoq.
Kommunalbestyrelsi oktobarimi ataatsimeeqqittussaavoq, atorfiillu 29-t tassani aalajangiiffigineqassapput. Tamannali pitinnagu Kikkut tamat Oqartussaaqataanerat, Kommune, Attaveqaqatigiinneq Attaveqaatinullu Ataatsimiititaliaq inassuteqaateqartussaavoq, tassungalu aamma sulisunik pisariaqartitsineq ilanngunneqassaaq.
