Qaasuitsup Kommuniani qaqqami annaassiniartartut nutaat 17-it
Ilinniarnerat Ilulissani sapaatit-akunnerini 36-mi 37-milu ingerlanneqartoq, Qaasuitsup Kommuniata Qatserisartui tusagassiorfinnut nalunaaruteqarlutik ilisimatitsissutigaat.
Ilaatigut pinngortitami pisuttuartut arpattulluunniit sumiiffinni tikikkuminaatsuniitillutik napparsimalersimanertik imaluunniit ajoqusersimanertik pissutigalugu illoqarfimmut oqqunneqartariaqartut qatserisartut allunaasat atorlugit qaqqamit aqqunniartarpaat.
Qaasuitsup Kommuniata Qatserisartuini upalungaarsimaniarnermi pisortaq Bjarne Gregersen oqaluttuarpoq, Qaasuitsup Kommunianut takornariat illoqarfiit qimallugit nammineerlutik pinngortitamut angalasarusuttut malunnaatilimmik amerliartortut.
Qatserisartullu ukiumut arlaleriarlutik ajoqusersimasunik suliaritittariaqartunik ikiuiartortariaqartartut.
- Qaqqami annaassiniarneq portusuumi annaassiniarnermik taaneqartartumut eqqaanarsinnaavoq, annaasiniartut putorsuarnit imaluunniit qutsissupilussuarmit annaassiniartarmata, allaanerussutigaali annaassiniartut allunaasat atornerini qanoq iliorluni aalajangersuinissartik eqqarsaatigeqqissaartariaqaramikku, soorlu ilaatigut allunaasanut pituttuivissaminnik qaarsumut qillerisariaqartarlutik, pisortaq oqaluttuarpoq.
Qaqqami annaassiniarnermik ilinniartitsinerup saniatigut aamma annaassiniarnermi isumannaallisaanermilu atortut pisariaqartut pissarsiarineqarsimasut, Qaasuitsup Kommuniata Qatserisartuisa ilisimatitsissutigaat.