Qaasuitsup Kommuniani kukkusumik ilaatigut akissarsisitsisoqartarsimavoq
Qaasuitsup Kommuniata ingerlatsivia aningaasanik aqutsinerliorpoq, tamannalu ilaatigut pissutaalluni pisortaqatigiinnut kukkusumik pissarinngisaannillu akissarsisitsisoqartarlunilu ajunngitsorsiassaqartitsisoqartarsimavoq. Kukkunersiuisut nalunaarusiaanni arlalinni isorinnittuni tamanna atuarneqarsinnaavoq.
Kukkunersiuisullu nalunaarusiamik isorinnittumik nutaamik saqqummiussigaangata Qaasuitsup Kommuniani politikerit amerlanertigut akissuteqarneq ajortut kukkunersiuisut nalunaarusiaminni allaaseraat.
Qaasuitsup Kommunia aningaasanik amigaateqaannanngilaq, aningaasaatigineqartulli aamma aqunnerliorneqarlutik.
Nalunaarusiat isorinnittut arlallit AG-mit atuarneqarsimapput. Pisortaqatigiinnut akissarsisitsisarnerit ajunngitsorsiassaqartitsinerillu ilaatigut kukkunertaqartut takuneqarsinnaavoq, soorlu aamma suliassani toqqakkani suliffeqanngikkallarnermi ikiorsiissutini suliassat 20 procentiini kukkusumik ikiorsiissutisitsisoqartarsimanera aamma takuneqarsinnaasoq.
Borgmesterip Ole Dorphip allamik pisassaqarnini pissutigalugu oqaloqatigineqarnissaminut piffissaqarsimanngilaq, kommunimili iluarsiisoqaleruttortoq oqaatigaa.
- Sulisunik amigaateqarnerput pissutaalluni pissusissamisoornerusumik naatsorsuuserisinnaanissamut piffissami sivisuumi periarfissaqarsimanngilagut, sulisunilli ilinniarsimasunik maanna atorfinitsitsinikuuvugut, Ole Dorph KNR-imut oqarpoq.
Qaasuitsup Kommuniani aningaasatigut aqutsinerliortoqarsimasoq kukkusoqartarsimasorlu taassuma AG-mut nassuerutigaa:
- Ataaseq pingaarutilerujussuuvoq! Ukiuni marlunni aningaasaqarnermut pisortaqarsimanata maannakkut aalajangersimasumik aqutsisoqalersimavugut. Tamannalu soorunami pitsanngorsaataassaaq, Ole Dorph AG-mut oqarpoq.
Qaasuitsup Kommuniani pisortaqatigiinnut akissarsisitsinerni kukkusoqartarsimanerata saniatigut, suliffeqanngikkallarnermilu ikiorsiissutini kukkusoqartarsimanerata saniatigut meeqqanut tunngasunut suliassaqarfimmi, matumani pingaartumik suliassani inissiinernut tunngasut aamma kukkusoqartarsimasoq, kukkunersiuisut nalunaarusiaminni aamma tikkuartorpaat.
