Qaasuitsup Kommuniani ilinniartitaanerit aallunneqartut
Uummannami inissisimasussamik pikkorissaaviliortoqarnissaa isumaqatigiissutigineqarpoq, taamaaliornikkut Uummannami ilinniarnissamut periarfissanik nutaanik pilersitsoqarsinnaanngorlugu. Ataatsimoortumik aaqqiissuteqartoqarnissaa sulissutigineqarpoq, allanik ilinniaqqinneq, piginnaanngorsaqqiineq kiisalu aatsitassarsiornermut tunngasunik pikkorissaanerit Pikkorissaavimmut ataatsimut katersorneqassallutik.
-Ataatsimoortumik aaqqiissuteqartoqarneratigut sulilernissaq siunertaralugu ilinniartitsissaagut, tamatumalu saniatigut nunaqavissut sapinngisamik amerlanerit aatsitassarsiornerup iluani, inuussutissarsiutitut annertoorsuanngortussami, sulilernissaannut piginnaasanik pisariaqartunik ilinniartinnissaat qulakkiissavarput, Palle Christiansen isumaqarpoq, peqatigisaanillu nunatsinni innuttaasut aatsitassarsiornermi sulilernissamut ilinniarfissaannik allanillu ilinniarnissaannut pikkorissaanernik immikkoortunik pilersitsinikkut pikkorissaaviup siunissami atorneqarsinnaanissaa erseqqissarlugu.
Atuartut angerlarsimaffiani pioreersumi pissutsit ajorluinnarput, Hotel Uummannarlu pisiarineqaqqammersoq nutarsarneqareerpat atuartunullu angerlarsimaffinngortinneqareerpat, maanna najugartuusut nuutsinneqarmaarput. Kommunip naalakkersuisullu isumaqatigiissuteqarnerisigut aamma atuartut angerlarsimaffittaavata nutarternissaa sukkasuumik suliarineqartussanngorpoq.
-Atuartut angerlarsimaffiat maanna atuuttoq najugaqarfigissallugu naleqqutinngilaq, taamaammaat atuartut atuartullu angerlarsimaffianni sulisut sapinngisamik sukkanerpaamik atuartut angerlarsimaffittaannaassaannut nuutsittariaqarpagut, atuartut angerlarsimaffitoqaanni oquk suerlu pissutigalugit peqqissutsimikkut ajornartorsiulinnginnissaat anguniarlugu. Atuartut peqqissuunissaat pingaartittupilussuuarput, taamaammat kiisami iliuuseqartoqarnialernera nuannaarutigaarput, borgmester Jess Svane naqissusiivoq.