Qaasuitsup Kommuniani akileraarut qaffanneqassanngilaq
Borgmesterip Jess Svanep kommunit kattunnerisa kingorna ukiumi siullermi angusat nuannaarutigai, taamaattorli nassuerutigalugu kommunit arfineq-pingasut missingersuusiortarnikkut aningaasanillu aqutseriaatsikkut assigiinngeqisut nalimmassarnissaat imaannaasimanngitsoq.
- 2009-mi angusat naleqqussaanermut ilungersunartumut alloriarnertut siullertut isigisariaqarput, Jess Svane oqarpoq. Oqaatigalugulu kommunip ingerlatsinermut missingersuutaanit katillugit 1 milliardit koruuniusunit 50 millionit koruunit sipaarniutigineqarsimasut.
Taamaattorli Qaasuitsup Kommuniata sipaarniuteqarnermigut innuttaasunik kiffartuussinerup eqqorneqannginnissaa anguniarsimavaa. Aamma pisariaqartitsineq nassuerutigalugu, meeqqanut tunngasunut 10 millionit koruuninik aningaasaleeqqittoqartariaqarsimavoq.
Tassami meeqqat angerlarsimaffimmik avataannut inissinneqartariaqartut amerlanerulersimapput, immikkullu aningaasaliissuteqarnikkut ikilisarnissaannut suliniuteqartoqarniarpoq. Qaasuitsup Kommuniani 2009-mi meeqqat 49-t angerlarsimaffiup avataanut inissinneqartariaqarsimapput.
