Qaasuitsup kommuniani akileraarut 27 procentiussaaq
Innuttaasut akornanni nuannaartoqarlunilu ernumasoqarpoq. Qasigiannguit kommuniani innuttaasut 29 procenteertarput, Qeqertarsuarmiut 25 procenteertartut.
Ole Madsen SIK-mut ilaasortaq Qasigiannguaneersoq nuannaarpoq:
- Sulisartuulluni soorunalimi qujarunnarpoq.
Ilissi aappariittut inuunissinnut ulluinnarni qanoq sunniuteqarsinnaava?
- Pinngitsoorani ilorfaat tungaanut sunniuteqarsinnaassooq, naak Pilersuisoqarfimmiuulluni aningaasaq nalikikkaluartoq, kisianni ilaqutariittut inuunermut nuannaajallannanngitsuussanngilaq. Taamaakkaluartoq allatut ajornartumik aningaasat inuuniarnermut tunngasunut atortariaqassapput, tassami isorliunerusuniittugut sulisartuinnartullu akissarsiaqartuusugut inuussutissagut ilungersorluta pissarsiarisariaqartarpagut. Sinnilissuarnik peqannginneq taanna miserratigineqarsinnaanngilaq.
Sipaarnerulertariaqassavisi?
- Tassami taanna pinngitsoorneqarsinnaassanngilaq, akiliutissatigut malinnaaniarsariniarutta oorinik atuinikinnerulertariaqassaagut.
Qeqertarsuup kommuniani maannakkut 25 procenteertarput 27-imut qaffannissaa Qeqertarsuarmi SIP-p siulittaasuata Anda Kristiansen-ip ernumanartoqartippaa:
- Uatsinnut sulisartunut, SIK-p akigititai malillugit akissarsiaqartunut malunnaateqartoorunnanngilaq. Assersuutigalugu orsussaq akitsoreernikuuvoq aammalu naatsorsuutigisariaqassallutigu taamaanginnarnissaa. Aamma kallerup inneranut taamannangaatsiaq akiliuteqartarpugut, taava skattimut taamatut akiliilerutta malunnaateqanngitsoorunnanngilaq, Anda Kristiansen oqarpoq.
Qeqertarsuup kommuniani akileraarut tamakkerluni 42 procentiuvoq, Qasigiannguit Kommuneani 46 procentiulluni. 27 procenti aallaavigineqalerpat akileraarut tamakkerluni 44 procentiulissaaq.
