Qaasuitsup kommuniani aalisartut ikiorserneqarput

Qeqertarsuup tunuani, Uummannami Upernavimmilu umiatsiaararsortut anersaarulussinnaanngorput. Naalakkersuisut aalajangerput aqutsiveqarfinni taakkunani pingasuni pisassat katillugit 900 tonsinik qaffanneqassasut. Aqutsiviit tamarmik immikkut 300 tons-inik immikkut ukiup sinneranut pisasseqqinneqarput.
Allattoq Noah Mølgaard
aggustip 30-at 2012 13:36

Naalakkersuisut kissaatigisimavaat aqutsiveqarfinni pingasuni pisassat qaammammut 100 tonsinik ilaneqartassasut, pisasseeqqinnermilu piumasarineqarpoq aalisartut Pinngortitaleriffimmi ilisimasuut suleqatigilluinnassagaat. Taamaasilluni qalerallit pisarineqartut angissusaat nakkutiginiarneqarpoq qalerallillu tulaanneqartartut milliartulissappata aalisartut naatsorsuutigisinnaavaat immikkut pisassiissutigineqartut ilanngarneqarnissaat.

Immikkut pisasseeqqinnerup kinguneranik kommunimi suliffissaaleqisoqarnissaanut ernumaleraluarneq ilorraap tungaanut saatinneqarpoq. Suliffissuarni sulisut pisassat nungunneranni suliffissaartussaagaluit hundredet arlallit qaammatini aggersuni suliassaqaqqilerput.

Qeqertarsuup tunuani aqutsiveqarfimmi pisassiissutaareersunit sinneruttut aalisarnerat ataasinngorneq septemberip pingajuaniik nanginneqarsinnaavoq. Uummannap Upernaviullu aqutsiveqarfiini aalisarneq ingerlaqqiinnassaaq maannamut pisassiissutaareersut nunguppata.

Aalisarnermut attuumassuteqartut suleqatigalugit 2013-mi aamma 2014-mi aalisarnerup ingerlanneqarnissaa pilersaarusiorneqassaaq.