Qaasuitsup Kommunia suli atuisartunut ataatsimiititaliaqanngilaq

Qaasuitsup Kommuniani innuttaasut pisisartutut atuisartutullu atukkatik pillugit saaffigisassaaleqisarput.
Allattoq Jaaku Lyberth
marsip 16-at 2010 15:02

Ilimanami Ilulissanilu pisisartut atuisartut pisisartullu ataatsimiititaliaannut naammagittaalliuutissaqarluarput, saaffissaqanngillalli.

- Amigaatigiuaannarnikuuakka, nalusarparaluunniit sumut saaffiginnissallunga, Martha Lundblad Atuisartut pisisartullu ataatsimiititaliaata amigaataanera pillugu taama oqarpoq.

Pisisartup allap Matta Magnussenip isumaqatigaa.

- Iluaallunilu nuanniippoq, pisiassat tungaatigut eqqumasoqanngippallaaqimmat, oqarpoq.

Matta Magnussen Atuisartut pisisartullu ataatsimiititaliaanut saaffiginnissuteqarusukkaluarpoq, periarfissaanngilarli.

- Uanga nammineq anngukkusukkaluaqaakka, nammineq siusinaarlunga suliunnaarnersiuteqarama, akit minnerusut. Aali peqqinnartunik neriniarsarigaluartunga, napparsimasuugama. Taavalu saaffissagut suusut nalullutigit, Matta Magnussen oqarpoq.

Nerisassat akiisa qaffasippallaarneri kiisalu pisiniarfinni amigaataasarneri apersorneqartut tamarmik ajornartorsiutaasutut taakkartorpaat, tamakkulu atuisartut pisartullu ataatsimiititaliaannit pilersinneqartussamit misissorneqarnissaat kissaatigineqarput.

Pisisartut ilaat Kasper Wille ima oqarpoq:

- Nioqqutissat atorluarneqarnerpaajusartut amigaataaneri, taakku pinerussagaluarpakka, taamatut uanga oqarsinnaavunga.

Qaasuitsup Kommuniani Atuisartut pisisartullu ataatsimiititaliaat suli pilersinneqarsimannginnera aamma tupigineqarpoq, amigaatigineqaqimmat.

Kasper Wille aamma Martha Lundblad ima oqarput:

- Tupigaara uanga taamatut qisuariarneq kingusitsigisukkut pissappat.

Naammagittaalliorfissatut amigaatigiuaannarparput.

Innuttaasut Atuisartut pisisartullu ataatsimiititaliaannik amigaateqarnerat Qaasuitsup Kommuniannit paasilluarneqarsinnaavoq. Inatsisillu amigaataaneri pissutigalugit pisisartut naammagittaalliorfigisinnaasaannik suli pilersitsisoqanngilaq.