Qaasuitsup Kommunia kisimi innuttaasunik tusarniaavoq
Qaasuitsup Kommunia, kommunini sisamaasuni kisiartaalluni innuttaasunik tusarniaanissamut periarfissaqarsimavoq.
- Qaasuitsup Kommuniani isumaginninnermut siulittaasup Bent B. Kristiansenip oqaatigaa, apeqqummi taama pingaaruteqartigisumi innuttaasunik tusarniaanissaq pingaaruteqarluinnartoq. Taamaattorli nunatsinni kommunit sinnerisa pingasuusut tusarniaanermi piffissakilliorneq pissutigalugu meeqqat atugaat pillugit innuttaasunik ataatsimiisitsinngillat.
Kommune Kujallermi aamma Qeqqata Kommuniani kommunit kattunnerannut atatillugu suliassanik allanik ulapputeqarsimapput, aamma Kommuneqarfik Sermersuumi tungiuinermut ataatsimiititaliap siulittaasuata Astrid Fleischer Rexip kommunip anginerujussua pissutigalugu piareersarluakkamik innuttaasunik ataatsimiititsinissaq ajornakusoornerarpaa.
KANUKOKA-p pisortaata Martha Labansenip kommunit isumasioqatigiinnerminni angusaqarluarnissaat naatsorsuutigaa:
- Meeqqat atugaat pillugit misissuinerpassuit isumasioqatigiinnermilu eqqartorneqartut, meeqqat atugaat pillugit iliuuseqarnissamik ujartuipput, tamannalu sulissutigissavarput KANUKOKAp pisortaa oqarpoq.
