Qaasuitsup Kommunia iliuuseqaqquaat
Royal Greenlandip tusagassiuutinut nalunaarummini sulisut 20-t suliffissaaruttussatut nalunaarutigai, kisianni Aasianni inuutissarsiornermut siunnersuisoqatigiit sakkortunerusumik eqquisoqassasoq tikkuarpaat.
- Aalisakkanik tunisassiorfiit pineqartut pingasut sumiiffinnut pineqartunut pingaarutilerujussuupput, tassami taakkunani tunitsiveqanngippat tunisassiortoqanngippallu, tamaani nunaqaannarnissamut tunngavissaaruttussaammat, inuutissarsiornermut siunnersuisoqatigiit allapput, pissutsillu ukiualuit matuma siornagut Aasianni fabrikkip matuneqarneranut eqqaanartuunerarlugit.
Taamaattumik Aasianni Inuutissarsiornermut siunnersuisoqatigiit, Qaasuitsup Kommuniani kommunalbestyrelsi sakkortuumik suliniuteqaqqullugu qinnuigaat, taamaalilluni kommunip kujasinnerpaartaani innutaasut siunissaminnik ernummateqarnatik inuutissarsiornerminnik ingerlatsiinnarsinnaaniassamatta, Inuutissarsiornermi siunnersuisoqatigiit Qaasuitsup Kommunianut allakkaminni ilaatigut taama kajumissaaripput.
