Qaasuitsup kommunia avissaartuussutigaat

-Tassa kissaatigaarput avinneqarnissaa, pissutigalugu innuttaasunut sullissineq ungavarujorujussuarsimammat, taamaasillunilu aamma innuttaasut oqartussaaqataanerat aanngarsimalluni. Taamaalilluni kommunip isorartunerujussuata aammalu paasititsiniaanermi sakkugineqarsinnaasut radiot allallu inuuttooqqanerisa kinguneranik innuttaasunik sullissineq kinguariarujussuarsimasoq, Siumut sinnerlugu Qaasuitsup Kommuniani kommunalbestyrelsemut qineqqusaartoq Enok Sandgreen taama oqarpoq. Parteeqataatali Jess Svanep kommunip avinneqarnissaa qineqqusaarutiginngilaa.

-Uanga taanna toqqaannartumik avitsinissamik oqariartorneq, suliareriikkagut aallaavigalugit, inuit atugaat aallaavigalugit, toqqaannartumik isumaqatiginagu oqaatigisinnaavara. Siumukkunni assigiinngitsunik isumaqarsinnaanerput aamma ataqqivarput, Jess Svane oqarpoq

Iluliarmiullu qinersisartut aamma assigiinngitsunik isumaqarput.

-Isumaqanngilanga Qaasuitsup Kommunia aggulunneqassasoq, isumaqarpunga utaqqilaartariaqartugut piffissamik tunillugu iluamik ingerlalerniassappat. Aamma kommuni pillugu pitsaanerusumik suleqatigiittoqalernissaa naatsorsuutigaara, Morten Vincentz Jørgensen oqarpoq.

Aammali akerlianik isumalik naapitassaavoq.

-Uanga isumanga malillugu avinneqaruni pitsaanerussagaluarpoq, annertungami aamma Qaasuitsup kommunia, tassa suliniarnermut tunngassuteqartuni aamma inulerinerni allanillu suliffissaaleqinermik pilersitsigami, Abraham Andersen oqarpoq .

Inuit Ataqatigiit kommunerujussuup iluaqutitai nalilersoqquai kommunip avinnissaa kisiat sammivallaarnagu. Kattusseqatigiit Partiiat aamma Atassut isumaqarput kommuni avinneqartariaqartoq, Demokraatit kommunipangisuup periarfissai takusinnaagamikkit kommunerujussuup avinneqarnissaa qineqqusaarutiginngilaat.

Tusagassiortunngorniaq Susanne Karlsen ilanngutassiamik suliaqartuuvoq.