Qaasuitsup Kommunia aningaasatigut ajornartorsiuteqarpoq

Qaasuitsup Kommuniata ukiumut missigersuusiaannit isertitat amerlanerugaluartut, taamaattoq aningaasartuutissat amerlanerujussuupput. Tamanna kommunip missigersuutaasa kukkunersiorneqartut takutippaat, tassami kukkunersiunerup takutittussaammagu, kommuni missigersuutit akuerisaasut malillugit ingerlatsinersoq.

- Pingaarnerpaatut tikkuartariaqarput inunnik isumaginninnermi aamma meeqqanut inuusuttunullu ikiorsiissutinik katillugit 19 millioner koruuninik atuinerunissarput. Kiisalu aamma utoqqarnut 8,5 millioner koruuninik atuinerunissarput naatsorsorneqarsimalluni.))

Qaasuitsup Kommuniani pisortaaneq, Hans Eriksen KNR-imut taama oqarpoq.

Qaasuitsup Kommuniani inunnik isumaginninnermut aningaasartuutaasussatut missigersuutit 35 millioner koruuninik sinnerneqarsimasut saniatigut allaffissornermut atugassatut missigersuutit 16,5 millioner koruuninik sinnerneqarsimapput.

Aningaasanik taama amerlatigisunik missigersuutit qaangerneqarneri Karrata Kangerluani ajunaarnersuaqaneranut attuumassuteqanngitsoq, Hans Eriksen oqarpoq.

- Naamik tassunga ilaanngillat. Tassami ajunaarnersuaq qitiusuminngaanniit aningaasartuutigineqarmat. Kisiannili uangut tassuunakkut aamma soorunami assigiinngitsutigut aningaasartuuteqarpugut. Kisianni tamannaanngilaq aningaasanik nikisitsigaartoq.

Qaasuitsup Kommuniata pisortaanera, Hans Eriksen oqarpoq.

Amigartoorutissat ikilileriffiginiarneqarneranni sanaartugassat annertuut marluk unitsinneqarput tamatumalu saniatigut atuarfeqarfik 4 millioner koruuninik sipaarfigineqarluni.

Qaasuitsup Kommuniata aningaasarliornerata, Avannaani kommunit ukiortaamit marluulersussat aningaasaqarneri pinngitsoorani killuup tungaanut eqqortussaassagai, Qeqertalik Kommuninngortussami borgmesterissaq, Ane Hansen (IA) oqarpoq.

- Aningaasat ajunngitsumik aqunneqarnissaat naatsorsuutigisimagaluarparput. Siorna annertuumik sinneqartoorneq ukioq manna aamma pissasoq naatsorsuutigisimagaluarparput, tamannali tassa maanna ajutoorpoq ingammik inunnik isumaginnikkut suliat eqqorneqarlutik, Ane Hansen pakatsisimaqisoq KNR-imut oqarpoq imalu nangilluni.

- Qaasuitsup Kommuniani aqutsisut taamatullu borgmesterip missigersuutinik taama ajortigisunik inerniliineri paasiuminaappoq.

Qaasuitsup Kommunianit nassuiaasoqarnissaa Ane Hansenip aamma ujartorparpaa aamma oqarluni kommunip nutaassap aappaagumut missigersuutissaat maanna misissoqqissaarneqalersut, taamaaliornermi aningaasatigut ajutuunnginnissaq pinngitsoortinneqassammat.