Qaasuitsup Kommunalbestyrelseani paatsiveerunneqarpoq

Nutartigaq 11:23

Kommunalbestyrelse ullaap tungaagut ataatsimiittussanngormat, borgmesteri Jess Svane (S) telefonikkut peqataavoq.

Jess Svane pilersaarutaasumik feeriaraluarpoq, taamaattumillu sinniisussaq Hansiaraq Zeeb ataatsimiinnermi peqataalluni. Borgmesterip feeriarnerani tullersortaa Timooq Mølgaard (A) ataatsimiinnermi aqutsisuuvoq.

Kommunalbestyrelsep ataatsimiinnerani, naatsorsuutini ukiunut tulliuttunut missingersuutini sipaarutissat 15 millioni koruunit 20 milioni koruunillu akornanniittut eqqartorneqarput.

Ullormut oqaluuserisassat najuuttunit akuerineqartinnagit, Jess Svanep piumasaraa, ataatsimiinneq kinguartinneqassasoq, nammineq ataatsimiinnermi najuukkusukkami. Borgmesterip feeriarnini unitsiinnarlugu Ilulissanut unipallanniarluni oqaraluartoq, kommunalbestyrelsep ataatsimiinnerani najuuttut arlallit piumasaraat ataatsimiinneq ullormut oqaluuserisassat najoqqutaralugit ingerlaannassasoq. Isumaqarpummi Jess Svane peqataaniarnani nalunaareernini pillugu kommunalbestyrelsemi ilaasortat 21-usut 22-ssaattut peqataasinnaanngitsoq.

Jess Svane KNR-imut tassataavannguaq erseqqissaavoq, ataatsimiinnermi peqataanani, taamaallaalli kommunalbestyrelse siunnersorsimagaluarlugu kinguartitseqqullugu.

- Kommunalbestyrelsemi ataatsimeeqataasut ataatsimiinneq nangissanerlugu namminneq aalajangissavaat, oqarpoq, allamilli oqaasissaqannginnerarluni, oqarluni Qaasuitsup Kommunia paasiniaaffigiinnassagipput.

Inerneraa, kommunalbestyrelsemi ataatsimiinneq unitsinneqarallarmat, kisianni naapeqqissapput ullormullu oqaluuserisassat akuerissanerlugit aalajangiiffigissallugu.

Pisut tunngavigalugit, kommunalbestyrelsemi partiit Inuit Ataqatigiit aamma Siumut ilaasortaatitaat parteeqatiminnik maannakkorpiaq naapeqateqarput.