NEQEROORTITSINEQ Qaasuitsup: 50 millionit koruuninut pisiniarsinnaanermut neqeroortitsisoqanngilaq
Kommuneqarfik Sermersuumiilli isumaqatigiissutip allaannerussutigaa Qaasuitsup Kommuniani pisisarnissamik isumaqatigiissutigineqartut paaqqinnittarfinnuinnaq pinngimmat kisiannili kommunip suliffeqarfiinut tamanut, tassa utoqqaat illui, meeqqeriviit meeraaqqeriviit allalu, isumaqatigiissusiortoqarsimalluni 55 millionit koruunit tungaannut nalilimmik.
Qaasuitsup Kommuniani pisortaanerup Hans Eriksenip ullumi tamanna uppernarsarpaa.
Aamma atuaruk Sermersooq neqeroortitsilertorpoq
- Aap taamaaliorsimavugut, niueqatigiinnissamik isumaqatigiissutip 2009-meersup ingerlateqqinneruaa, taamaammat Arctic Importimuinnangajak ullumi niueqateqartarpugut, Hans Eriksen oqarpoq.
Arctic Importimuinnaq pisiniartassapput
Arctic Importimik isumaqatigiissut nutaaq ima kinguneqarpoq: Januaarip allaqqaataanit 2016-imit kommunip suliffeqarfii tamarmik kommunillu allaffeqarfii tamarmik Arctic Importimuinnaq pisiniaqqusaapput.
Pisiassallu Arctic Importip pisiassaatiginngisai, kommunnit suliffeqarfiisa Arctic Import aqqutigalugu piniartassagai, Hans Eriksen nassuiaavoq.
Aamma atuaruk Sermersooq kommuninik nakkutilliisoqarfimmut GE-p suliassanngortinniaraa
- Arctic Import allanik niueqateqarmat pisariaqartitatik tamarmik Arctic Import aqqutigalugu pissarsiarisinnaavaat, taamaattumik pisiniarnerit tamarmik Arctic Importimut pisiniarnerussapput, Hans Eriksen oqarpoq.
Neqeroortitsisoqarsimanngilaq
Kommunip nioqqutissanik ukiumut 50 millionit 55 millionillu koruunit missaannik nalilinnik pisisarpoq, Hans Eriksen paasissutissiivoq.
Arctic Importimilli isumaqatigiissuteqarneq sioqqullugu neqeroortitsisoqarsimanngitsoq nassuerutigaa.
-Arctic Importimik isumaqatigiissusiunnginnitsinni neqeroortitseqqaarnissarput pisariaqartissimanngilarput. Akileraartartunulluunniit iluaqutaasimassagaluarpat, Hans Eriksen oqarpoq.
Malittarisassanik unioqqutitsisoqanngilaq
Suliariumannittussarsiornissamut malittarisassat kommunimullu pisinnaatitsissut kommunip unioqqutissimanngikkai aalajangiusimavaa.
- Amerlasuukkaartunik nioqquteqartut allat akigititai misissoreerlugit Arctic Importimut pisiniarneq akikinnerusutut nalilersimavarput, Hans Eriksen ersarissaavoq.
Aamma atuaruk Paaqqinniffiit pisiniartarfissaannut neqeroortitsisoqanngilaq
Arctic Importimuinnaq pisiniartarnissamik isumaqatigiissuteqarnikkut kommunip ukiumut 6,7 millionit koruuninik sipaaruteqartarnissaa naatsorsuutigineqarpoq.
- Allanit pisigutta taama sipaartiginavianngilagut, kommunimit nalunaarput.
Arctic Importimut isumaqatigiissut ukiunut marlunnut atuuttussaavoq, decembarip 31-ani 2017-imi atorunnaassalluni, Qaasuitsup Kommuniani pisortaaneq Hans Eriksen KNR-imut oqarpoq.
- Taamanikkussamut isumaqatigiissut qanoq sipaaruteqartitsigisimanersoq takussavarput, Arctic Importimillu isumaqatigiissuteqarnerput attatiinnassaneripput allanulluunniit isumaqatiginninniassanerluta nalilersorlugu, Qaasuitsup Kommuniani pisortaaneq, Hans Eriksen, oqarpoq.
