Qaasuitsumi suliffissaaleqisut 580-it pikkorissartinneqassapput
-Taamatut iliuuseqarnissaq nunatta oqaluttuarisaanerani aatsaat taama annertutigisumik iliuuserineqarnerusussaannguatsiarpoq, tassa aningaasarpassuit atorneqassapput, 16,5 millionit koruunit atorneqartussaapput.Qaasuitsup kommuniani Inuussutissarsiornermut, Aatsitassarsiornermut Takornariaqarnermullu ataatsimiititaliami siulittaasoq, Peter Olsen kommunimi suliffissaaleqisut maajip naanerani nalunaarutigineqartut 1830-iusut, kingornalu 1300-it tungaanut appariarsimasunut iliuusissatut pilersaarutip nalinga pillugu taama oqarpoq.
Iliuusissatut pilersaarummi suliffissaaleqisut 580-it missaat, illoqarfimmiittut nunaqarfinnilu inuussutissarsiutinut assigiinngitsunut pikkorissarneqassapput, pilersaarullu Peter Olsenip pitsaasutut nalilerpaa.
-Isumaqarpunga pilersaarut ajunngilluinnartuusoq. Assigiipajaaraluarput qangatut iliuuserineqartartut, kisianni nutaaqutigivaa unnuisarfinni taavalu aamma hotelini aamma neriniartarfinni sulilersinnaasunik aamma pikkorissaatitsisoqassammat.
- Aamma soorlu aatsitassarsiornermut uuliasiornermut tunngasunut pikkorissaanerit annertuut ingerlanneqartussaammata, Peter Olsen oqarpoq nassuiaallunilu sanaartornerup iluani isaterisartussanik katiterisartussanillu aamma pikkorissaasoqassasoq.
Nunaqarfinni suliffissaaleqiffiusuni soorlu Ikerasaarsummi, Akunnaami, Qeqertami Aappilattumi nunaqarfinnilu 25 procentinik suliffissaaleqiffiusuni nunaqarfinni teknikkerissatut, paaviaasutut eqqagassalerisutullu suliaqartussanik ilinniartitsisoqassaaq.
- Nunaqarfinnut tunngatillugu eqqagassanik katersisarneq, eqqagassalerisarneq taanna ilaatigut aamma sammineqartussaammat isumaqarpunga nutaarsiassartaasoq pingaartoq pitsaarsorlu, Peter Olsen oqarpoq.
Iliuusissatut pilersaarummi suliffissaaleqisut 580-it pikkorissarneqassasut naatsorsuutigineqarpoq, pikkorissaanerit ilinniartitseqqiinerillu ukiuni marlunni ingerlanneqassallutik. Kisianni kommunimi sulisinnaaasut 15 procentii upernaaq maanna suliffissaaleqipput 1300-nullu maanna appariarlutik. Iliuusissatullu pilersaarut naammannersoq Peter Olsen aperaarput.
-Soorunami taanna eqqartorneqarsinnaavoq, kisianni taamaakkaluartoq isumaqarpunga affaata missaat iliuuseqarfiginiarneqarneri angusaq naammagisimaarnartoq aamma pitsaasorlu, Peter Olsen oqarpoq.
