Qaasuitsumi Siumut: Soraarsitsisoqassanngilaq!

- Siumup gruppiata tamakkerluni ippassaq juunip 16-anni ataatsimiinnerminni aalajangerpaat, sipaarniarnermut tunngasoq ataatsimiititaliani tamanit suliarineqassasoq. Ataatsimiititaliat siulittaasui ualimut sisamanut naapisinneqassapput, tassani qanoq suleriuseqartoqarnissaanik isumaqatigiissallutik.

Siumup gruppiata siulittaasua, Palle Jerimiassen taama oqarpoq.

Qaasuitsup Kommuniani sulisut 80-it sapaatip akunnerani kingullermi, sisamanngornermi nalunaarfigineqarput erngiinnaartumik soraarsinneqartussanngorlutik. Tallimanngornermili nalunaarfigineqarput soraarsitsiortornissaq qaammammik ataatsimik kinguartinneqarallartoq.

Kinguartitsinermut pissutaavoq, nalilersuilluartoqarnissaa. Qaasuistup borgmesteria, Ole Dorph tallimanngormat oqarpoq, nalilersuisoqareernerani kommuni sipaarutissanik nassaarsinnaanngippat, soraarsitsiortornissaq pisariaqassasoq.

Taamalu siunertaqarneq Qaasuitsumi Siumup gruppeata tallimanngormat isumaqatigaat, oqarlutilli soraarsitsiortornissamik pilersaaruteqarneq periarfissat kingullersarissagaat aamma oqarlutik kommunimi sipaarniarneq avaqqunneqarsinnaanngitsoq oqariartuutaasorlu isumaqatigalugu.

Palle Jerimiassenili ullumi oqarpoq  ataatsimiititaliat tamarluinnarmik sipaarniutissanik allanik ujartuinissaat Siumup gruppeanit siunnersuutaalermat.

- Ataatsimiititaliallu sipaarniutissanik ujarlereerpata, taakku siunenrsuutaat aningaasaqarnermut ataatsimiititaliamut ingerlanneqassapput. Taakkulu suliartik kommuinalbestyrelsmut ingerlatitseqqiissapput, taamaalilluni kommunalbestyrelse tamarmiusoq suliamut peqataatinneqassallutik.

Palle Jerimiassen aamma oqarpoq, soraarsitsiortornissamik isuma qimalluinnarneqartariaqartoq.

- Taamaattumik aningaasanik pinngitsoorani nassaartoqassaaq, ataatsimiititaliallu tamarmiusut nassaarneranni kommunalbestyrelse tamarmiusoq akisussaatinneqassalluni.

Qaasuitsup Kommuniani Siumup gruppeata siulittaasua, Palle Jerimiassen taama oqarpoq.