Qaasuitsumi akileraarut qaffassaaq

NUTARTIGAQ: Akileraarutip qaffannissaa ilaasortanit aqqanilinnit akuersaarneqarpoq, tassaasunit Inuit Ataqatigiinnit, Atassummit, Demokraatinit Kattusseqatigiillu Partiiannit. Illuatungaanilu Siumup ilaasortaatitai quliusut ikinnerussuteqarlutik naaggaartut, sermitsiaq.ag-mi allaaserineqarpoq.

Kommunip aningaasaqarnera pillugu oqallinneq Qaasuitsup Kommuniani Inuit Ataqatigiit Siumumik suleqateqarunnaarnerannik kinguneqarpoq.

Siumup aningaasatigut akisussaassuseqanngitsumik ingerlatsiniarnera suleqatigiikkunnaarnermut peqqutaasoq, Inuit Ataqatigiinnit oqaatigineqarpoq.

Taamatuttaaq kommunimi borgmesteri, Jess Svane, aningaasatigut aqutsisinnaannginnerarlugu IA-mit isornartorsiorneqarpoq.

Partiit taakku marluk suleqatigiinnissamik oktobarimi 2008-mi atsioqatigiipput.

Qaasuitsup Kommuniani Siumut qulingiluanik issiatitaqarpoq, Inuit Ataqatigiit tallimanik.

Kommunalbestyrelsi 2011-p aallartilaarnerani tulliani ataatsimiissaaq.

Ataatsimiinnissap tungaanut piffissaq Siumup suleqatissarsiorluni atorniaraa, Palle Jerimiassen, Siumumeersoq sermitsiaq.ag-mut oqarpoq.