Qaasuitsoq unammisitsinermi ajugaarusuppoq
- Qimmussernerup kisimi pinnani angallatigineqarsinnaasut allat pinngortitamik mingutsitsisuupput, soorlu umiatsiat, qamuteralaat, biilit allallu, Qaasuitsup kommuniani immikkut siunnersorti Mette Skarregaard Petersen oqarpoq.
- Qimussit aqqutai ukiuni kingullerni aserfallallutillu ulorianarsiartuinnartut pillugit aalisartunit, piniartunit takornarialerisunillu saaffigineqartualerpugut, Tamatumalu kingunerisaanik EU-mi suliniut peqataaffigilerparput, tassanngaanniillu aningaasanik qimussit aqqutaanik aserfallatsaaliuinissamut atugassanik tunineqarpugut, Qaasuitsup kommuniani immikkut siunnersorti Mette Skarregaard Petersen oqarpoq, nassuiaallunilu illerngit aserfallatsaaliorniarlugit plastikkinik toqqaviliortoqartoq, taakkualu illerngit aputeqarnissaannut iluaqutaasut kiisalu naggorissaataallutik.
Illiniliuutit akuersisoqarneratigut imeqarfiup tungaani atorneqarput apummullu assiaqutit aamma ikkussuunneqarlutik.
Qimussit aqqutaannik aserfallatsaaliuineq nukinnik minguitsunik suliniuteqarnerusoq, Kommunimit isumaqartoqarpoq, tamannalu tunngavigalugu nunani avannarlerni nukissiuutitigut kommunemut unammeqataasoqarpoq.
- Qimussernerup saniatigut angallannissakkut periarfissat allat tassaapput umiatsiat, taakkualu CO2-mik mingutsitsisuupput, soorlu aamma qamuteralaat biilit assigisaallu mingutsitsisartut. Qimussernerli avatagiisinut mingutsitsisuunngilaq, Mette Skarregaard Petersen oqarpoq.
Qimussernermi CO2-mik aniasitsinikinneruneq suli kisitsisitalerneqanngitsoq, Mette Skarregaard Petersen nassuiaavoq, tamannali tullertut misilillugu misissorneqarsinnaanerarpaa.
Nukissiuuteqarneq pillugu nunat avannarliit ministeriisa aalajangersaasartui nukissiuutitigut kommune pillugu unammisitsusuupput. Unammisitsinermi ajungaasut nersorneqassapput, suliniutigineqartullu immikkut isiginiarneqassallutik.
Nukissiuutitigullu ataavartunik atuinermik suliniuteqarneq, Qaasuitsup kommunianit peqataaffigineqarumavoq.
Nunani avannarlerni nukissiuutitigut kommune upernaamut toqqarneqassaaq.
