Qaasuitsoq marlunnik immikkoortortaqarfiliulerpoq
Ilaatigut suliat aalajangiiffigineqartussat Ilulissani qaleriiaarlutik kinguaattoortarlutik. Sullissinerlu pitsanngorsarniarlugu Uummannami Aasiannilu immikkoortortaqarfiliortoqalerpoq.
-Kommunalbestyrelse akuersissuteqarpoq, Kommunimi sumiikkaluaruttaluunniit assigiikannersumik sullinneqarnissarput qulakkeerniarlugu, Borgmester Jess Svane oqarpoq.
-Uani ulluinnarni sullissinerup immaqa assigiinngitsorujussuusup assigiissarnissaa siunertarinerpaajullugu misissuisitsisimavugut. Taamaalillutalu massakkut aaqqissuusseqqinnissaq siunertaralugu kommunalbestyrelse akuersissuteqarnikuuvoq, kommunip iluani sumiikkaluaruttaluunniit najugaqaraluaruttaluunniit sumi arlaanni assigiikannersumik sullinneqarnissarput qulakkeerniarlugu, Borgmester Jess Svane kommunalbestyrelsep kingullermik ataatsimiinnermini aalajangernera pillugu taama oqarpoq.
Sullissivinni sulisut suliassanut innuttaasullu saaffiginnittarnerannut sanilliullugit amerlavallaartut misissuinermi takutinneqarpoq.
Ukiunilu marlunni tulliuttuni immikkoortortaqarfinni sulisut maanna 44-sut 30-nut appartinniarneqarput, tassa akissarsialeriviup, sulisoqarnerup aningaasaqarnikkullu immikkoortortaqarfiit qitiusunngortinneqarnerisigut sulisut ikilineqassallutik.
Sullissivinni aaqqissuusseqqinneq ukiut marluk iluini 5,2 millioni koruuninik sipaaruteqarfiussassoq naatsorsuutigineqarpoq.
Kommunit kattussuunnerisa kingorna qanimut oqartussaaqataaneq kinguariarsimasoq Borgmester Jess Svane oqarpoq. Ilulissani qitiusumik ingerlatsineq suliat kinguaattoortalerneranik kinguneqarluni.
-Tassalu imaappoq, ilaatigut, amerlavallaartutigut qitiusoqarfimmut, Ilulissanut, ingerlatitseqqiisarneq, suliatigut sukkaallisaataasimanissaa takuneqarsinnaasimalluni, taannalu allanngortikkusupparput, Borgmester Jess Svane oqarpoq.
Aasianni Uummannamilu immikkoortortaqarfinnik piorsaasoqassaaq, atorfilittat suliassanut aalajangiisalernissannut akisussaaffilerneqarlutik nalunaarfigineqareertut, borgmester Jess Svane nassuiaavoq. Ilulissat, Qasigiannguit aamma Kangaatsiaq Aasiaanni immikkoortortaqarfimmit akisussaaffigineqalissapput. Qeqertarsuaq, Upernavik aamma Qaanaaq Uummannamit akisussaaffigineqalerlutik.
-Soorlu utoqqalerinerit, angerlarsimaffinni ikiorteqarnerit, teknikkimut tunngasut, nunaminertanut qinnuteqarnernut tunngasut Ilulissanut sangujartuaartissimavagut, tassalu taanna allanngortikkusupparput, immikkoortortaqarfinnut marlunnut akisussaaffinnik annerusunik tunniussinikkut, taamaalillutik suliat sukkanerusumik ingerlasinnaalerniassammata, borgmester Jess Svane oqarpoq.
Aasianni Uummannamilu immikkoortortaqarfiit aatsaat aallarnisarneqaleruttortut, borgmester Jess svanep erseqqissaatigaa.
