Qaarusunni annerpaanngorsinnaavoq
Qaarusuliornissap aallartisarnerani aqqusinniortussat inuit 600-t pisariaqartinneqarput kingusinnerusukkullu inuit 300-t suliffeqarsinnaassallutik.
Aatsitassaleriffiup aatsitassaq molybdæn, saviminiliornermi atorneqartartoq qallorniarpaa.
Tunumi molybdæneqarfik nunarsuatsinni annersat ilagaat, aatsitassaq 200 millioni tonsit sinnerlugit oqimaassusilik piiarneqarsinnaammat qaarusuk aallartippat ukiorpassuarni suliffiusinnaassaaq. Qaarusuliassami suliffissat amerlassusaat eqqarsaatigalugu qaarusuk angisoorujussuussaaq, tassa kuultisiorfimmiit, olivinisiorfimmiit, aqerlusiorfiutigaluni zinkisiorfimmiit, eudialytisiorfimmiillu sulisoqarnerussalluni, Aatsitassat pillugit qullersaqarfimmi pisortaq, Jørn Skov Nielsen oqarpoq.
Qaarusuk tunumi nunap eqqissisimatitap kujasinnerusortaaniissaaq.
- Nunami eqqissisimatitami avatangiisit mingutsinneqannginnissat nakkutigeqqissaarlugu qaarusuliortoqarsinnaavoq, soorlu Kalaallit Nunaanni sumiluunniit qaarusuliortoqassatillugu nakkutigeqqissaarneqartuaannartut, Jørn Skov Nielsen oqarpoq.
Qaarusummi kalaallit sulisussat pisariaqartinneqassammata Namminersornerullutik Oqartussat qaarusummi sulisussatut ilinniarfissamut, Sisimiuniittussamut 50 millioni koruuninik illuartitsipput.
