Qaarusummi sulisut qallorneqaleruttorput

Chilemi qaarusummi sulisut, aggustilli tallimaani nunap iluanut matoorunneqartut, nunap qaavanut piffissami matumanerpiaq amoorlugit qallorneqaleruttorput.
oktobarip 13-at 2010 07:42

Siulleq qaarusummiit San José-miit ullaaq qaqinneqarpoq. 31-nik ukiullip, Florencio Avalosip, nunap qaava ulluni 69-ini takusimanagu unnuaq uagut nalunaaqutarput malillugu ataaseq qaangerlugu tanneq marluk kingumut takuvaa. Maanna uppernarsarneqarpoq, Avalosip kingorna allat tallimat annaanneqareersut.

Qaarusummi sulisut taakku qaammatit marluk sinnerlugit nunap iluani sakkortoqisumik mattussaaqqanerat Chilimi nunarsuullu sinnerani qanimut malittarineqaqqissaarpoq.

Qaarusummi sulisup ataatsip, nunap iluani 700 meterisut ititigisumiit amoorneqarnera minutsinik 15-inik 20-nilluunniit sivisussuseqartarnissaa ilimagineqarpoq, kapseli immikkut ittoq annaassiniarnermi atorneqarpoq.

Angutit 33-t tamarmik nakorsanit arlaleriarlutik sukumiisumik misissorneqartussaapput, nunap iluaniinnerminni peqqissutsimikkut ajoqusersimannginnersut qulakkeerniarlugu. Angutit taakku maqaasineqartutut Chilimi oqartussaasunut nalunaarutigineqarnikuummata inussamik ipaasaannik aamma tunniussissapput, kinaassusertik uppernarsiniarlugu.

Annaassiniarneq suli ullormik unnuamillu ataatsimik suli sivisussuseqassangatinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq