Qaartoqarnerani niviarsiaraq 13-inik ukiulik ajunaartoq

Sisimiut eqqaanni Sarfannguit eqqaanni illuaqqami ippassaq qaartoortoqarnerani niviarsiaraq 13-inik ukiulik ajunnarpoq niviarsiararlu alla 14-inik ukiulik uutitersimaqaluni. Kalaallit Nunaanni politiit taama ilisimatitsipput.

Politiit oqarnerat naapertorlugu ulloqeqqalernerani tanneq qulingiluat marlunnik tulleriinnik qaarpallattoqartoq inunnit arlalinnit tusaaneqarsimavoq.

Taama pisoqarmat politiit, qatserisartut peqinnissaqarfimmiillu kangerlummut pisoqarfiliarput. Kalaallit Nunaanni politiit pigaartuat Julie Senderovitz Bendtsen KNR-imut taama oqarpoq.

- Niviarsiaraq 13-inik ukiulik ajuunaarpoq, niviarsiararlu alla 14-inik ukiulik uutitingaatsiarsimavoq. Inersimasoq suli tuparujussuaqqavoq, inunnillu suli oqaloqateqarsinnaanani, pigaartoq oqaluttuarpoq.

Qaartoorneq politiit suli misissorpaat, ilisimaneqartorlu tassaavoq illuaqqami marlunnik gassiisiveqarsimavoq.

- Taakku qaartoorsinnaanerat ilimanarsinnaavoq, kisianni ilumut taakku qaarsimasinnaanersut uppernarseqqaassavarput, pigaartut pisortaat oqarpoq.

Niviarsiaqqap ajunaartup ilaqutai qanigisaalu ilisimatinneqareerput, niviarsiaqqallu allap uutitersimasup ilaqutai aamma ilisimatinneqareerlutik.