Qaartitsinissamik sioorasaarinerit qallunaat mittarfii niuertarfissuilu matugai
Qaartartumeerinissamik sioorasaarutit allakkatigut qarasaasiamiit nassiunneqartarsimapput. Maannamut pisiniarfissuit tallimat, mittarfeqarfiit pingasut taakkununnga ilaallutik Københavnip mittarfeqarfia, Københavnip Universitetia aamma ilinniarfik Copenhagen Business School sioorasaarneqarsimapput.
Sioorasaarutit siulliit Roskildip Aarhusillu mittarfeqarfiinut pisiniarfissuarnullu marlunnut Sjællandimiittumut nassiunneqarput. Piffiinnit sisamaniit taakkunaniit inuit qimarngussortinneqarput, qimmillu qaartartunik ujaasitinneqarlutik. Politiilli ualeq manna nalunaaruteqarput qaartartunik nassaartoqarsimanngitsoq.
Københavnilli Fynillu politiivi ullumi kingusinnerusukkut sioorasaarisoqarmat inunnik qimarngussuisimanngillat, allakkammi sioorasaarutit inummit ataatsimit nassiunneqarsimapput assigiinngillu oqaasertaqarlutik.
Danskit nalunaaqutaat malillugu nalunaaqutaq arfinermut politiit inummik tigusarisaqarsimapput. Tamanna Sjællandip Kujataata aamma Lolland-Falsterip politiivisa TV ØST-imut uppernarsarpaat.
- Uppernarsarsinnaavara inummik tigusarinnikkatta, tamannalu sioorasaarinermut attuumassuteqarmat, pisortaq Jesper Lovmand tv-qafimmut taama oqarpoq. Tigusarinninnerminnulli atatillugu annerusumik oqaaseqaateqarusunnatik.
